27 სექტემბერს, შუადღისას, ნიდერლანდების მთავარი აეროპორტის - „სხიპჰოლის“ ასაფრენი ბილიკი დაახლოებით 45 წუთით დაიხურა მას შემდეგ, რაც იქ დრონი შენიშნეს. ამის შესახებ ადგილობრივი მედია იუწყება.

არსებული ინფორმაციით, ადგილობრივი დროით დაახლოებით 12:10 საათზე საჰაერო მოძრაობის დისპეტჩერებმა პილოტებისგან რამდენიმე სიგნალი მიიღეს, რომლებმაც დრონი დაახლოებით 150 მეტრის სიმაღლეზე დაინახეს.

YouTube-ზე ავიაციის დამკვირვებლის პირდაპირი ტრანსლაციის დროს გაიგეს, როგორ ეუბნებოდა „ტრანსავიას“ თვითმფრინავის კაპიტანი დისპეტჩერებს, რომ დრონი მისი თვითმფრინავიდან 50 მეტრის დაშორებით დაფრინავდა.

სამართალდამცველების ცნობით, დრონის ძებნაში რამდენიმე დანაყოფი იყო ჩართული. ასევე, მონაწილეობდა პოლიციის ვერტმფრენი, თუმცა ვერც დრონი და ვერც მისი ოპერატორი ვერ იპოვეს. სპიკერმა ივარაუდა, რომ ის „ალბათ სამოყვარულო“ იყო, რადგან ამის შემდეგ დრონი აღარ უნახავთ.

ამავდროულად, მან ერთ-ერთ ასაფრენ ბილიკზე დრონის გამო საჰაერო მოძრაობის შეჩერების ინციდენტს „საკმაოდ უნიკალური“ უწოდა. 45 წუთის განმავლობაში თვითმფრინავები სხვა ასაფრენ ბილიკზე გადაამისამართეს.

უცნობია, რა სახის დრონი იყო ის, მაგრამ, სავარაუდოდ, პატარა ზომის იყო. ასაფრენი ბილიკი დაახლოებით 13:00 საათზე გაიხსნა.

„სხიპჰოლის“ აეროპორტის თავზე და მის გარშემო დრონების ფრენა აკრძალულია, ავიაციისთვის მათი პოტენციური საფრთხის გამო.

წელს ნიდერლანდების აეროდრომებზე საეჭვო დრონების შესახებ უკვე 22 შეტყობინება დაფიქსირდა.