საქართველოს პროკურატურამ განსაკუთრებით დიდი ოდენობით ნარკოტიკული საშუალების უკანონო შეძენის, შენახვის და რეალიზაციის ხელშეწყობის ფაქტზე უცხო ქვეყნის მოქალაქეს ბრალდება წარუდგინა. ინფორმაციას პროკურატურა ავრცელებს.

შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულმა უკანონოდ შეიძინა განსაკუთრებით დიდი ოდენობით ნარკოტიკული საშუალება 549, 189 გრამი „მდმა“, 10, 63 გრამი „კოკაინი“(ფუძე) და 29, 52 გრამი „ამფეტამინი“, რასაც უკანონოდ ინახავდა მის დროებით საცხოვრებელ ბინაში და რეალიზაციის ხელშეწყობის მიზნით, ნარკოტიკული საშუალებები დააფასოვა.

სამართალდამცველმა აღნიშნული ნარკოტიკული საშუალებები ჩხრეკის შედეგად ამოიღეს. ასევე, ამოღებულია პოლიეთილენის პაკეტები, რეზინის ხელთათმანები, შავი ფერის წებოვანი ლენტი, ორი ცალი ელექტრო სასწორი და ვაკუმ შესაფუთი ელექტრო აპარატი.

დაკავებულს ბრალდება საქართველოს სისხლის სამართლის კოდექსის 260-ე მუხლის მესამე ნაწილის „ა“ ქვეპუნქტით (განსაკუთრებით დიდი ოდენობით ნარკოტიკული საშუალების უკანონო შეძენა და შენახვა) და 260-ე კვარტა მუხლის მეექვსე ნაწილის ,,ა’’ ქვეპუნქტით (განსაკუთრებით დიდი ოდენობით ნარკოტიკული საშუალების უკანონო რეალიზაციის ხელშეწყობა) წარედგინა, რაც სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს.

პროკურატურამ ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს უკვე მიმართა.