ისრაელის პრემიერ-მინისტრი, ბენიამინ ნეთანიაჰუ კიდევ ერთხელ აცხადებს, რომ ისრაელი რაფაში უახლოეს მომავალში ოპერაციას დაიწყებს.

"გამარჯვება ხელმისაწვდომია. ჩვენ ამას ვაპირებთ. ვაპირებთ, მივწვდეთ „ჰამასის" დარჩენილ ტერორისტულ ბატალიონებს რაფაჰში, რომელიც უკანასკნელი ბასტიონია", - განაცხადა ნეთანიაჰუმ.

ისრაელის პრემიერი პირობას დებს, რომ მშვიდობიანი მოსახლეობისთვის უსაფრთხო გასასვლელი უზრუნველყოფილი იქნება.

„ვაპირებთ, უზრუნველვყოთ უსაფრთხო გასასვლელი მშვიდობიანი მოსახლეობისთვის, რათა მათ გასვლა შეძლონ", - აღნიშნა ნეთანიაჰუმ.

კითხვაზე, თუ სად უნდა წავიდნენ პალესტინელები, ნეთანიაჰუმ უპასუხა, რომ - დეტალურ გეგმაზე მუშაობა მიმდინარეობს.

"ისინი, ვინც გვეუბნებიან, რომ არავითარ შემთხვევაში არ უნდა შევიდეთ რაფაჰში, პრინციპში, გვეუბნებიან: "წააგეთ ომი, შეინარჩუნეთ „ჰამასი" იქ", - აღნიშნა ნეთანიაჰუმ.

ცნობისთვის, პრემიერ-მინისტრმა თავის სამხედროებს დაავალა, მოემზადონ ქალაქიდან დაახლოებით 1.3 მილიონი ადამიანის ევაკუაციისთვის.

შეერთებულმა შტატებმა ისრაელი გააფრთხილა, რომ ასეთი ოპერაციის განხორციელება საფუძვლიანი დაგეგმვის გარეშე კატასტროფა იქნება.