იმ ავტომფლობელების გამოსავლენად, რომლებიც ზამთრის საბურავებით არ სარგებლობენ, საპატრულო პოლიციამ რეგიონებში საკონტროლო გამშვები პუნქტები მოაწყო, სადაც პატრულ-ინსპექტორები საბურავების მახასიათებლებსა და ვადას ამოწმებენ. ამგვარი პუნქტები მოწყობილია საავტომობილო გზის იმ მონაკვეთებში, სადაც დიდთოვლობაა და მაღალია მოცურების რისკი.

ჯამში ასეთი სახიფათო მონაკვეთი საქართველოში 35-ია, სადაც ზამთრის საბურავის გარეშე ავტომობილი 1-ლი დეკემბრიდან 1-ელ მარტამდე პერიოდში არ დაიშვება. მძღოლების თქმით, ისინი რეგულაციების შესახებ წინასწარ არავის გაუფრთხილებია. სახელდახელოდ მიღებული კანონის გამო კი ზამთრის საბურავებზე ფასებმა სპეკულაციურად მოიმატა.