საპარლამენტო არჩევნებამდე თითქმის ერთ წლით ადრე სულ უფრო აქტუალური ხდება, თუ რა სტრატეგიულ კამპანიას აირჩევენ მთავარი პოლიტიკური აქტორები - რა იქნება მათი მთავარი გზავნილები და შეთავაზება ამომრჩევლის მიმართ, რაზე იქნება აქცენტირებული პარტიული პროგრამა და როგორ აპირებენ მხარდამჭერების რიცხვის გაზრდას.
ანალიტიკოსი გია აბაშიძე „რეზონანსთან" ამბობს, რომ დღეს საქართველოში მოქმედი მსხვილი პარტიები, ირჩევენ ნეგატიურ ან პოზიტიურ კამპანიებს. მათგან დადებითი ეფექტურია, ხოლო უარყოფითი - წამგებიანი. განსაკუთრებით მნიშვნელოვანია საზოგადოებრივ აზრზე გავლენის მოხდენა მოკლე და რაციონალური გზავნილებით.
„საქართველოს პოლიტიკურ სივრცეში არის ორგვარი კამპანია - პოზიტიური და ნეგატიური. პოზიტიურს და საქმიანს მისდევს „ქართული ოცნება" უკვე მრავალი წელია და ეს მისი გამარჯვების ფორმულაა - უკვე მესამე ვადით არის არჩეული ხელისუფლებაში.
„ეს იმიტომ რომ „ნაციონალური მოძრაობა" და მასთან აფილირებული პარტიები ირჩევენ დესტრუქციულ, ნეგატიურ კამპანიას, რომელიც დაფუძნებულია ძირითადად ტყუილებზე, ფეიკნიუსებზე, მანიპულაციებზე და თუ რამეს სთავაზობენ საზოგადოებას, ეს არის რაღაც სადღეგრძელოების დონეზე პოლიტიკური დაპირებები, არეალისტური. შედეგად, ნეგატივზე აგებული კამპანია არცერთ ქვეყანაში არ ამართლებს - ეს ათწლეულებმა დაამტკიცა.
„თუმცა, „ნაციონალურმა მოძრაობამ" და მისმა სატელიტებმა ვერ შეიმეცნეს ეს, რომ არ შეიძლება ამგვარი პიარკამპანია, მითუმეტეს, როდესაც საზოგადოების გულის მოგება გინდა და ამ დროს თავს ესხმი საპატრიარქოს, საზოგადოებისთვის ძალიან ცნობილ პიროვნებებს სპორტში თუ ხელოვნებაში და ვერანაირად ვერ გააცნობიერეს რომ არ შეიძლება ამგვარი პოლიტიკური კამპანიით რაიმე წარმატებაზე საუბარი.
„ამომრჩეველთან საუბარი პიარტექნოლოგიურად არის ის, რომ მოკლე გზავნილები გაუგზავნონ კონკრეტული საქმიანი წინადადებებით, რასაც აკეთებს „ქართული ოცნება". საზოგადოებას სთავაზობ მოკლე, დადებით მესიჯ-ბოქსს. საპირწონედ ამისა, „ნაც-მოძრაობა" და ზოგადად „ნაც-ოპოზიცია" პირიქით, სთავაზობენ ნეგატივს და სიცრუეს. სიცრუეს ადვილად ასხვავებს ხალხი, იმ ფონზე, როდესაც ბოლო მონაცემებით, საქართველოში ინტერეტიზაციის მაჩვენებელი 83%-მდე ავიდა.
„ფეიკნიუსის უარყოფა მარტივად ხდება, როდესც ჩახედავ სხვადასხვა სანდო მედიაწყაროს და როდესაც ჩახედავ სოცქსელებში სანდო ამა თუ იმ პოლიტიკურ აქტორს. ეს „ნაცმოძრაობისთვის" ან უცხო ხილია, ან აბსოლუტურად აუთვისებელი საგანია. აქედან გამომდინარეობს მათი მუდმივი წარუმატებლობა არჩევნების ყველა ეტაპზე" - განაცხადა „რეზონანსთან" გია აბაშიძემ.
პოლიტიკის ანალიტიკოსი ზაალ ანჯაფარიძე „რეზონანსთან" განმარტავს, რომ პიარკამპანია საკმაოდ წარმატებულია, როცა ის პერსონიფიცირებულია, ანუ საუბარი ხდება საზოგადოებასთან ცალკეული პიროვნებების დონეზე. იმ წარმომადგენლის მეშვეობით, რომელსაც მეტ-ნაკლებად იცნობს ხალხი და სიტყვა ეთქმის საზოგადოების წინაშე.
„ამასთან, როცა როგორც პოლიტიკური აქტორი, უცხო მეთოდებს დანერგავ პიარკამპანიის დროს, მთავარი პრობლემა არის ის, რომ ჯერ ამ სიახლის შესახებ საზოგადოება უნდა იყოს ინფორმირებული, რადგან ადამიანი არჩევანს ვერ გააკეთებს, თუ არ იცის რა არის უმჯობესი, ანუ პრიორიტეტი.
„მე მგონი ჯერ კამპანია არცერთ პოლიტიკურ პარტიას არ დაუწყია, თუ არ ჩავთვლით სოფო ჯაფარიძეს, რომელიც ნებისმიერ პიარკამპანიას სააკაშვილის სახელით აკეთებს, ვგულისხმობ, რეგიონებში ჩასვლის შესახებ ფაქტს, რომ ფაქტობრივად, მისი პირით მიხეილ სააკაშვილი ესაუბროს მოსახლეობას.
„როგორც ჩანს ეს კამპანია, რომელიც „ნაციონალურმა მოძრაობამ" წამოიწყო, სხვებზე უფრო ადრე, მაინც პერსონიფიცირებულ კამპანიის სახეს ატარებს. ანუ, მოსახლეობასთან საუბარი ხდება პიროვნებების დონეზე, ანუ იმ ადამიანების სახელით, ვისაც საზოგადოება სცნობს, აქვს მასზე გარკვეული წარმოდგენა.
„ჩვენი საზოგადოება სტრატეგიული და საზოგადოებრივი კომუნიკაციების დროს უფრო პიროვნებებზე აკეთებს აქცენტს, პიროვნებების უფრო სჯერა, ვიდრე პარტიების პროგრამების და იდეოლოგიების. შესაბამისად, პიარსტრატეგიაც ძირითადად ალბათ ამაზე იქნება აგებული, ანუ პერსონების წინ წამოწევაზე, მათი დადებითი თვისებების მაქსიმალურ გამოყენება.
„მაგალითად „ლელომ", რომელმაც წინა საპარლამენტო არჩევნების დროს კამპანია დაიწყო თავისი ეგრედ წოდებული „მარშალის" გეგმის გაპიარებით. დიდი ვერაფერი შედეგი მიიღო ამ კამპანიამ და დღეს ფაქტობრივად, ეს გეგმა მივიწყებულია. თვითონაც აღარ ახსენებენ, იმიტომ რომ ვერ იმუშავა ამ პიარკამპანიამ. ქუჩაში რომ გააჩეროთ, შემთხვევითი შერჩევით 10 ადამიანი და ჰკითხოთ რა არის „მარშალის" გეგმა, შეიძლება იქედან უმრავლესობამ ვერც გიპასუხოთ ამ კითხვაზე და თუ ვინმე გიპასუხებთ, შეიძლება ზუსტი პასუხი ვერც მოგცეს.
„შეიძლება სმენიათ, მაგრამ დეტალები არ იციან. როდესაც შენ ასეთი დასახელების ბრენდი შემოგაქვს და ამ დროს მოსახლეობას ამაზე ფაქტობრივად წარმოდგენა არა აქვს, ეს ჩვენს საზოგადოებაში მისი თავისებურებებიდან გამომდინარე ნაკლებად მუშაობს. „ლელოს" პიარკამპანიის ჩავარდნა ამის ძალიან დიდი თვალსაჩინო მაგალითია" - განაცხადა „რეზონანსთან" ზაალ ანჯაფარიძემ.