მოლდოვას პრეზიდენტის, მაია სანდუს განცხადებით, გაიხსნა ელექტროგადამცემი ხაზი, რომელიც ქვეყანას რუმინეთთან და ევროპის ელექტროგადამცემ ქსელთან აკავშირებს. „დღეს ჩვენ გავხსენით ვულკანეშტი-კიშინიოვის ელექტროგადამცემი ხაზი, რომელიც მოლდოვას რუმინეთთან და ევროპის ელექტროგადამცემ ქსელთან აკავშირებს.
ათწლეულების განმავლობაში მოსკოვი ენერგორესურსებს ჩვენს შანტაჟისთვის იყენებდა. ეს დასრულდა: მოლდოვა რუსულ გაზს ნულოვანი რაოდენობით ყიდულობს, რუმინეთთან კი კიდევ ორი ელექტროგადამცემი ხაზის გაყვანა იგეგმება. მადლობა ყველას, ვინც ეს შესაძლებელი გახადა", - წერს სანდუ სოციალურ ქსელში.
მოლდოვა ბუნებრივი აირის იმპორტის კუთხით, თითქმის სრულად იყო დამოკიდებული რუსულ გაზის კომპანია „გაზპრომზე". 2022 წლის დეკემბერში კიშინეუმ „გაზპრომისგან" გაზის შესყიდვა შეწყვიტა, მაგრამ დნესტრისპირეთში მდებარე კუჩურგანის ელექტროსადგური კვლავ იღებდა რუსულ გაზს. მოლდოვა კი ელექტროენერგიას სწორედ ამ სადგურისგან ყიდულობდა.
2023 წელს რუსული „გაზპრომისგან" გაზის შესყიდვა შეწყვიტა მდინარე დნესტრის მარჯვენა სანაპიროს - კიშინიოვის მთავრობის კონტროლის ქვეშ მყოფი ტერიტორიის - საჭიროებებისთვის. იმ პერიოდში მოლდოვის მაშინდელმა პრემიერ-მინისტრმა, დორინ რეჩანმა განაცხადა, რომ უკრაინაში რუსეთის სრულმასშტაბიანი შეჭრის შემდეგ, მოხმარების შემცირების გზით, ქვეყანამ რუსულ გაზზე დამოკიდებულება დაასრულა.
ექსპერტები ერთხმად აღნიშნავენ, რომ ვულკანეშტი-კიშინიოვის ელექტროგადამცემი ხაზის გახსნა და რუმინეთთან დაკავშირება მოლდოვას ენერგოუსაფრთხოებისა და გეოპოლიტიკური დამოუკიდებლობის ისტორიული მიღწევაა.
ექსპერტების შეფასებით, ათწლეულების განმავლობაში ენერგეტიკა იყო მთავარი ბერკეტი, რომლითაც რუსეთი მოლდოვაზე პოლიტიკურ ზეწოლას ახდენდა. ახალი ინფრასტრუქტურული პროექტი ქვეყანას სრულად ათავისუფლებს რეგიონულ ენერგეტიკულ რისკებსა და შანტაჟზე დამოკიდებულებისგან. მათი პროგნოზით, ალტერნატიული ენერგოდერეფნების გაჩენა მომავალში ხელს შეუწყობს ტარიფების დასტაბილურებას და ბაზარზე ჯანსაღი კონკურენციის შექმნას, რაც საბოლოო ჯამში მოლდოვის მოქალაქეებს და ეკონომიკას დაიცავს მოულოდნელი კრიზისებისგან.
თუმცა, ანალიტიკოსები ყურადღებას ამახვილებენ იმ გამოწვევებზეც, რაც რეგიონის რთულ გეოპოლიტიკურ ვითარებას უკავშირდება - განსაკუთრებით დნესტრისპირეთის საკითხსა და ენერგოტარიფების დასტაბილურებასთან დაკავშირებით. მიუხედავად ამისა, ძირითადი შეფასებით, ეს ნაბიჯი წარმოადგენს მოლდოვას ევროინტეგრაციის გზაზე გადადგმულ უმნიშვნელოვანეს პრაქტიკულ ნაბიჯს, რომელიც ქვეყნის ევროპულ ენერგობაზართან ინტეგრაციას საბოლოოდ უზრუნველყოფს.