მოსკოვის საარბიტრაჟო სასამართლომ კომპანია „კოკა კოლას" სარჩელი წარმოებაში მიიღო. ამერიკული მწარმოებელი მოითხოვს, რომ ცხინვალში რეგისტრირებულ შ.პ.ს. „კოკა-კოლა კომპანიას" რუსეთში ამერიკული ბრენდის სახელის გამოყენება აეკრძალოს. მათი ცნობით, ცხინვალური კომპანია რუსეთის ბაზარს ფალსიფიცირებული „კოკა-კოლათი" ამარაგებს, თანაც ქართულენოვანი ეტიკეტით.

ექსპრეზიდენტი სალომე ზურაბიშვილი ისევ ახალ ერთიან პოლიტიკურ პლატფორმაზე და ტექნიკური მთვრობის შექმნის საჭიროებაზე ალაპარაკდა. საუბარია მმართველი პარტიის პოლიტიკური ალტერნატივის შექმნაზე, რომელიც მოემზადება იმ დღისთვის, როდესაც ხელისუფლების შეცვლა რეალური გახება. კეთდება მინიშნება, რომ ეს კავშირშია 28 ნოემბერს დაგეგმილ აქციასთან.

ანაკლიის პროექტს ჯერ კიდევ არ ჰყავს ინვესტორი. ერთ-ერთ გადაცემაში, საქართველოს ყოფილი ელჩი ჩინეთში, დავით აფციაური ვარაუდობს, რომ ჩინურ სახელმწიფო კორპორაცია CCCC-თან კონტრაქტის გაფორმების გაჭიანურების მიზეზი გლობალური გეოპოლიტიკური ცვლილებები და რეგიონში არსებული რისკებია. პარტნიორები, სავარაუდოდ, დამატებით ანალიზს ატარებენ. ყოფილი ელჩის ამ ვარაუდს კატეგორიულად არ ეთანხმებიან ეკონომიკის ექსპერტები. მათი ინფორმაციით, ჩინურ სახელმწიფო კორპორაციასა და საქართველოს სახელმწიფოს შორის ჯერ კიდევ მიმდინარეობს მოლაპარაკებები, ასევე ზუსტდება ის ქვეპუნქტებიც, რაც ამ ხელშეკრულებას ახლავს. გაჭიანურების სავარაუდო მიზეზი შეიძლება იყოს საკადრო ცვლილებები საქართველოს მთავრობაში და ყველაზე მთავარი - აშშ-ჩინეთის ინტერესთა თანხვედრა სამხრეთის დერეფანში. 

პედოფილიასა და სხვა დანაშაულებზე მსჯავრდებულ ჯეფრი ეპშტეინთან დაკავშირებული დოკუმენტების მორიგი პარტია გამოქვეყნდა და, როგორც ამბობენ, ამის უკან ტრამპის პოლიტიკური ოპონენტები დგანან. ეს მასალები ერთმნიშნვნელოვნად სცხებენ ჩირქს პრეზიდენტს, რომელზეც ადრეც დადიოდა ხმები, თითქოს ეპშტეინის არასრულწლოვანი გოგონების სექსუალურ მომსახურებას იღებდა. სხვათაშორის ამაში ტრამპს ერთ დროს მისმა მოკავშირე ილონ მასკმაც დასდო ბრალი, მას შემდეგ, რაც შიდა დაპირსპირების გამო მათი გზები გაიყო. თუმცა მოგვიანებით მასკმა ეს შეურაცხმყოფელი პოსტი თავის იქს-იდან წაშალა.

მმართველი პარტია ბერლინთან გაუარესებული ურთიერთობის ფონზე, გახარიას ექსტრადირების მოთხოვნას არ გამორიცხავს. რეაგირება როგორი იქნება ამის პროგნოზირება ანალიტიკოსების ნაწილს უჭირს, თუმცა როგორც რამაზ საყვარელიძე აცხადებს, გერმანია ერთ-ერთი „მომხრეა იმ ზეწოლისა", რასაც ევროპული სტრუქტურები საქართველოს ხელისუფლებაზე ახორციელებენ.

ონლაინგამოცემა პრაიმ ტაიმის მიერ გავრცელებული ინფორმაცია, რომ ოპოზიციას 13 ნოემბრის ბრიფინგზე წასაკითხი დოკუმენტი ბრიუსელიდან გამოუგზავნეს, ისევ განხილვის ეპიცენტრშია. ოპოზიცია ამ ყველაფერს აბსურდულ ბრალდებას უწოდებს, ხელისუფლება კი გარე დირექტივებზე საუბრობს და აღნიშნავს, რომ ამჯერად უკვე ფაქტებით დადასტურდა, რომ ოპოზიციას „გარედან კარნახობენ".

ორ ქვეყანას შორის ისედაც დაძაბული ურთიერთობის ფონზე, გერმანიის ელჩი, პეტერ ფიშერი საქართველოში დაბრუნებისთანავე ოპოზიციის მიტინგზე დემონსტრაციულად მივიდა და აქციის მონაწილეებს სოლიდარობა გამოუცხადა. მმართველ პარტიაში ამაზე მწვავე რეაქცია ჰქონდათ და განაცხადეს, რომ „კონსულტაციიდან დაბრუნების შემდეგ იმედი გვქონდა, ელჩი თავს შეიკავებდა, მაგრამ რამდენიმე დღე არ გასულა და მასხრად აგვიგდო".

შესალოა საქართველომ ექსპრემიერ გიორგი გახარიას ექსტრადიცია მოითხოვოს. მას დაუსწრებლად 13 წელი შეეფარდა. გუნდის წევრებს არ გაკვირვებიათ სასამართლოს გადაწყვეტილება და აცხადებენ, რომ „პროკურატურა და სასამართლო არ არსებობს, [და] თავიდან ბოლომდე პოლიტიკური მდგენელით გაჟღენთილი საქმეა". თავად გახარია რამდენიმე თვეა, საქართველოში არ იმყოფება და ჯერჯერობით ჩამოსვლას არ აპირებს.

„ოცნება" ამტკიცებს, რომ რეალურად დღეს ქვეყანაში ხელისუფლების წინააღმდეგ პროტესტი არ არსებობს და მხოლოდ გარე ძალებისგან დაფინანსებული ჯგუფი დადის რუსთაველზე ყოველდღიურად. თუმცა როგორც ოპოზიცია საპირისპიროდ ამბობს, ხალხის უმრავლესობა მათ მხარესაა და ახალი გამოსვლებისთვის ემზადება.

მიხეილ სააკაშვილი, რომელიც ღამით „ვივა მედიდან" ციხეში დააბრუნეს, საკნიდან წერილს აგზავნის. პენიტენციური სამსახურისა და ჯანდაცვის სამინისტროს ცნობით, მესამე პრეზიდენტს ჯანმრთელობის პრობლემები აღარ აქვს და სასჯელი აქვს მოსახდელი. თავად სააკაშვილი და მისი ოჯახი ირწმუნებიან, რომ რუსთავის ციხეში გაფრთხილების გარეშე დააბრუნეს და მოწამვლის სიმპტომები კვლავ არის.

პოლიტოლოგი იგორ კვესელავა ვერაფერს ხედავს იმაში უცნაურს, რომ ყოფილი პრეზიდენტი ციხეში გადაიყვანეს. ამბობს, რომ ეს არის ერთის მხრივ საზოგადოების მოთხოვნა და მეორეს მხრივ, თვითონ ხელისუფლების დაინტერესება. „რეზონანსთან" ის ევროპასთან ვიზების შემოღების ალბათობაზეც საუბრობს და მიიჩნევს, რომ შეზღუდვები, დიდი ალბათობით, "ოცნების" ხალხს უფრო შეეხება, ვიდრე რიგით მოქალაქეებს.

მან ასევე აღნიშნა, რომ ევროპაში საქართველოს საკითხი გადაწყვეტილია, თუმცა მნიშვნელოვანია რომელი ვარიანტი გავა.

ელექტროენერგიის გადასახადის გაძვირება, ფაქტობრივად, გადაწყვეტილია. როგორც გუშინ გახდა ცნობილი, დენის ტარიფი შესაძლოა, ისევ 3 თეთრით გაძვირდეს, რა მოცულობითაც 2 წლის წინ შემცირდა. ეს უკვე მეორე ასეთი კომბინაციაა. როდესაც ,,ქართული ოცნება" ქვეყნის სათავეში მოვიდა, 3.5 თეთრით შემცირდა დენის გადასახადი და მერე ზუსტად იმდენივეთი გაიზარდა. ამჯერადაც იგივე კომბინაცია გათამაშდება.

ქვეყანაში მინიმალური ხელფასი ჯერ ისევ 20 ლარია, რომელიც შევარდნაძოს დროს დაწესდა. ეს თავისებური კაზუსია. „გახარია საქართველოსთვის“ დეპუტატმა, სოფო ხორგუანმა ხელფასის მინიმალური ზღვრის კანონით დადგენა მოითხოვა. მისი ინიციატივით, მინიმალური ხელფასი 1000 ლარის ოდენობით უნდა განისაზღვროს, თუმცა ფინანსთა მინისტრმა განაცხადა, რომ ეს შეუძლებელია. ლაშა ხუციშვილმა განმარტა, რომ ეს ინიციატივა უმუშევრობას გამოიწვევს, რადგან ბიზნეს-ოპერატორები, რომლებიც ვერ შეძლებენ დადგენილ ზღვარზე ან ამ ზღვარს ზევით გადაუხადონ ხელფასი დასაქმებულებს, ცხადია, ამას მათი გათავისუფლება მოჰყვება. 

„სფერო ჰოლდინგის“ დამფუძნებელი გივი წულეისკირი, დიდი ოდენობით თანხის მოტყუებით დაუფლების ფაქტზე, დააკავეს. სისხლის სამართლებრივი დევნა დაიწყო „სფერო ინვესტის“ დირექტორის, გიორგი მურუსიძის მიმართაც. გამოძიების მიხედვით, „სფერო ჰოლდინგმა“ და „სფერო ინვესტმა“ 244 მოქალაქესთან გაფორმებული სხვადასხვა ხელშეკრულების ფარგლებში, ჯამში, 12 მილიონამდე ლარი უკანონოდ მიითვისეს. თაღლითური გზით შექმნილი კომპანიების საშუალებით, მოქალაქეების მოტყუება და შემდეგ მათი „გადაგდება“ ახალი არ არის. 

თბილისის განვითარების გენერალური გეგმა უკვე გადასახედია. სპეციალისტების განცხადებით, დოკუმენტი უნდა დაკორექტირდეს ისე, რომ ურბანული გამჭიდროვება მაქსიმალურად იქნას გათვალისწინებული და ახალ მოთხოვნებს დაექვემდებაროს. არსებული გენგეგმა 2015 წელს შემუშავდა, მაგრამ დედაქალაქში მდგომარეობა სწრაფად შეიცვალა, ახალი მოთხოვნები გაჩნდა და  დოკუმენტიც კორექტირებას საჭიროებს.

უცხოელი ავტოდილერების გაკონტროლება და მათი დაჯარიმება დაიწყო. ქართველი ავტოიმპორტიორები უცხოელ კონკურენტებთან შექმნილ არათანაბარ პირობებზე დიდი ხანია საუბრობენ. მათი ინფორმაციით, ყირგიზეთისა და ყაზახეთის მოქალაქეები საქართველოში ავტომობილების იმპორტს და რეექსპორტს, გადასახადების გვერდის ავლით ახორციელებენ. შედეგად კი, ადგილობრივი ავტობიზნესი და ბიუჯეტიც ზარალდება.

შეუძლია თუ არა საჯარო მოხელეს მეორე სამსახური ჰქონდეს - ამ საკითხზე ორი კვირაა ახალმა კანონმა უკვე პასუხი გასცა. მმართველი პარტიის შეფასებით, ახალი რეგულაციები საჯარო სამსახურებში „მეტ კეთილსინდისიერებასა და ანგარიშვალდებულებას" დაამკვიდრებს, თუმცა ჩამონათვალში მოხვდნენ ისეთი სფეროები, რომელთა წარმომადგელების მხრიდან უკმაყოფილება წამოვიდა და ეს მათთვის სრული მოულოდნელობა აღმოჩნდა.

აშშ-ის სახელმწიფო მდივანი მარკო რუბიო უარყოფს „ზოგიერთი მოკავშირის" კრიტიკას კარიბის ზღვის აუზში აშშ-ის დარტყმების კანონიერებაზე და აცხადებს, რომ ევროპელებს არ აქვთ უფლება განსაზღვრონ, თუ როგორ დაიცავს ვაშინგტონი თავის ეროვნულ უსაფრთხოებას.

დონბასის, ხარკოვისა და ზაპოროჟიას ფრონტებზე გააფთრებული ბრძოლების ფონზე კიევში ისეთი მძლავრი კორუფციული სკანდალი აგორდა, რომ შეიძლება, არც მეტი არც ნაკლები, თავად პრეზიდენტ ზელენსკის შეუქმნას, ასე ვთქვათ, ეგზისტენციური საფრთხე. მისი ძმაკაცი და პრეზიდენტის „შავ კასირად" წოდებული პერსონა სავარაუდოდ ისრაელშია გაქცეული, მინისტრები კი მეტეორებივით ცვივიან საკუთარი სავარძლებიდან. სკანდალმა ისეთი სენსაციური ელფერი მიიღო, რომ სამხედრო ექსპერტებიც კი ბოლო დღეების განმავლობაში ფრონტის ამბების კომენტირებას სწორედ ამაზე საუბარს ამჯობინებენ.