„თბილსერვის ჯგუფმა“ დიღმის ტყე-პარკის ტერიტორიაზე  დასუფთავების მასშტაბური აქცია გამართა. დასუფთავების აქციაში მონაწილეობა „თბილსერვის ჯგუფის“ დირექტორმა გიორგი პაპავამ, დიდუბის რაიონის გამგებელ დავით გელოვანთან და საკრებულოს მაჟორიტარ დეპუტატ შოთა ქევხიშვილთან ერთად მიიღო. აქციაში კომპანიის თანამშრომლებთან ერთად, აქტიურად ჩაერთნენ დიდუბის რაიონის გამგეობის წარმომადგენლები და ადგილობრივი მოსახლეობა.

ღონისძიების ფარგლებში, დიღმის ტყე-პარკის მთელი ტერიტორია სრულად გაიწმინდა დაგროვილი საყოფაცხოვრებო და სამშენებლო ნარჩენებისგან. კამპანიის მიზანი იყო რეკრეაციული ზონის მოწესრიგება, გარემოზე ზრუნვის კულტურის ამაღლება და მოქალაქეების აქტიური თანამონაწილეობით ქალაქის ეკოლოგიური მდგომარეობის გაუმჯობესება.

„თბილსერვის ჯგუფი“ და დედაქალაქის მერია მოუწოდებს დედაქალაქის მცხოვრებლებს, შემოუერთდნენ დასუფთავების აქციას და საკუთარი წვლილი შეიტანონ თბილისის მწვანე სივრცეების შენარჩუნება-მოწესრიგებაში.