საბერძნეთის საჰაერო ძალების F-16 ტიპის გამანადგურებელი თვითმფრინავი იძულებული გახდა, პოპულარულ საკურორტო კუნძულ ზაკინთოსის აეროპორტში ავარიულად დაშვებულიყო. დაშვებიდან მალევე, თვითმფრინავს ცეცხლი გაუჩნდა და აეროპორტი დაიხურა. ინფორმაციას გერმანული გამოცემა Bild-ი ავრცელებს.

საჰაერო ძალების ინფორმაციით, თვითმფრინავს სასწავლო ფრენის დროს ტექნიკური პრობლემა შეექმნა, რის შემდეგაც პილოტი ზაკინთოსის აეროპორტში გაემართა. ასაფრენ ბილიკზე თვითმფრინავი შასის გარეშე დაეშვა და ცეცხლი გაუჩნდა, თუმცა პილოტმა კაბინიდან გადმოსვლა მოახერხა და უვნებელი გადარჩა. მეხანძრეებმა ცეცხლი ჩააქრეს.

თვითმფრინავის ნამსხვრევების გამო, ასაფრენი ბილიკი ბლოკირებული იყო და აეროპორტი იძულებული გახდა ოპერაციები შეეჩერებინა. რამდენიმე თვითმფრინავმა აეროპორტში დაშვება ან აფრენა ვერ შეძლო, ზოგიერთი კი იძულებული გახდა მიმართულება შეეცვალა.

ბევრი დამსვენებლისთვის, ინციდენტმა რამდენიმესაათიანი შეფერხება გამოიწვია. აეროპორტი მხოლოდ მას შემდეგ გაიხსნა, რაც გამანადგურებელი თვითმფრინავის ნამსხვრევები იპოვეს.

 მედიის ცნობით, ავარიის მიზეზი ჯერჯერობით გაურკვეველია.