ავტოპარკი ეტაპობრივად განახლდება და ეს განახლება თავის მხრივ შეამცირებს გაფრქვევებს და მეორეს მხრივ აღარ დაემატება იმდენი - 25-30%-ზე მეტი ავტომობილი ყოველწლიურად, რაც საბოლოო ჯამში ერთიან ჭრილში გარკვეულ გაუმჯობესებას მოგვცემს, - განაცხადა გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა „იმედის დილაში“ ავტომობილების იმპორტთან დაკავშირებულ ახალ რეგულაციებზე საუბრისას.

მისი თქმით, ახალ რეგულაციებს რამდენიმე მიმართულებით ექნება შედეგი.

„საბოლოო ჯამში ეს არის მიზანი, რომ ერთის მხრივ, საცხოვრებელი გარემო, სადაც ჩვენ ვცხოვრობთ, მინიმუმ, გადაადგილება შევძლოთ, რადგან თუ მუდმივად დავამატებთ სატრანსპორტო საშუალებებს, ერთ მშვენიერ დღეს დიდ ქალაქებში გადაადგილება ფიზიკურად შეუძლებელი იქნება. ეს პრობლემა არა მხოლოდ თბილისში, არამედ რიგ ქალაქებში გვაქვს. და მეორეს მხრივ ჰაერის დაბინძურების საკითხი მოსაგვარებელია. ეს აკრძალვა არ ვრცელდება ელექტრო და ჰიბრიდულ ავტომობილებზე იმიტომ, რომ ისინი ნაკლებს აფრქვევს”, - განაცხადა მინისტრის მოადგილემ.

ახალ რეგულაციებზე პრემიერ-მინისტრმა მთავრობის სხდომაზე ისაუბრა. „პარლამენტში წარვადგინეთ კანონპროექტი, რომელიც ითვალისწინებს 6 წელზე მეტი წლოვანების ავტომობილების შემოყვანაზე აკრძალვის დაწესებას“, - განაცხადა ირაკლი კობახიძემ.