ევროპის საბჭომ განაცხადა, რომ მხარი დაუჭირა ყოფილი გენერალური მდივნისთვის ნორვეგიელი ტორბიორნ იაგლანდისთვის დიპლომატიური იმუნიტეტის მოხსნას, რაც პოლიციას საშუალებას მისცემს ჯეფრი ეპშტეინთან მისი კავშირები გამოიძიოს, - ინფორმაციას Reuters-ი ავრცელებს.
გამოცემა წერს, რომ ეს იმ ფონზე ხდება, როცა ნორვეგიის კრიმინალურმა პოლიციამ ყოფილი პრემიერ-მინისტრისა და საგარეო საქმეთა მინისტრის, ასევე ნობელის მშვიდობის პრემიის კომიტეტის ყოფილი თავმჯდომარის, ტორბიორნ იაგლანდის წინააღმდეგ, რომელიც კორუფციაშია ეჭვმიტანილი, გამოძიება დაიწყო.
იაგლანდისთვის, ჯერჯერობით, არანაირი ბრალდება არ წაუყენებიათ, თუმცა გამოძიება ეცდება დაადგინოს, მიიღო თუ არა საჩუქრები, მგზავრობის საშუალება და სესხები მის თანამდებობასთან დაკავშირებით.
„ევროპის საბჭოს გენერალური მდივნის რანგში არჩეული იაგლანდი დაარღვევდა მის თანამდებობასთან დაკავშირებულ განსაკუთრებულ ნდობას, თუ ის ქრთამს იღებდა“, - აღნიშნულია ნორვეგიის პოლიციის მიერ 8 თებერვალს გაგზავნილ წერილში, რომელშიც საბჭოს იმუნიტეტის მოხსნას სთხოვენ.
ეპშტეინის საქმის გამოქვეყნებული ფაილები სხვა ფაქტებთან ერთად აჩვენებს, რომ იაგლანდმა და ეპშტეინის თანაშემწეებმა 2014 წელს დეტალური გეგმები შეადგინეს იაგლანდის, მისი მეუღლის, ორი შვილისა და შვილის შეყვარებულის ეპშტეინთან ვიზიტისთვის პალმ-ბიჩსა და მის საკუთრებაში არსებულ კარიბის ზღვის კუნძულზე.
იაგლანდის ადვოკატმა ანდერს ბროსვიტმა განაცხადა, რომ იმუნიტეტის მოხსნის გადაწყვეტილება მოსალოდნელი იყო და იაგლანდი ითანამშრომლებს გამოძიებასთან ყველა საკითხის გასარკვევად.
„ის ამ საკითხს ძალიან სერიოზულად ეკიდება, მაგრამ სურს ხაზგასმით აღნიშნოს, რომ მისი აზრით, არ არსებობს გარემოებები, რომლებიც სისხლის სამართლის პასუხისმგებლობას წარმოადგენს“, - ნათქვამია ბროსვიტის განცხადებაში.
გამოძიების ჩასატარებლად აუცილებელი იყო იაგლანდისთვის იმუნიტეტის მოხსნა და ნორვეგიის საგარეო საქმეთა სამინისტრომ განაცხადა, რომ მათ ევროპის საბჭოს მინისტრთა კომიტეტს ამის გაკეთება სთხოვეს.
ევროპის საბჭოს ყოფილი გენერალური მდივანი ეპშტეინის კერძო კუნძულზე სტუმრობის ფაქტს უარყოფს.