31 დეკემბერს, თბილისში, ვაკის კორტებთან მომხდარი მკვლელობის ფაქტზე პროკურატურამ ერთ პირს ბრალდება წარუდგინა. ამის შესახებ ინფორმაციას საქართველოს პროკურატურა ავრცელებს. მათი ცნობით, განზრახ მკვლელობის გარდა პირს ბრალი იარაღის უკანონო შეძენა-შენახვა-ტარებისა და ნარკოტიკული საშუალების უკანონო შეძენა-შენახვის ფაქტზეც წარედგინა.
„გამოძიებით დადგინდა, რომ 31 დეკემბერს თბილისში, ზურაბ ავალიშვილის ქუჩის მიმდებარე ტერიტორიაზე, ბრალდებულმა წარსულში არსებული კონფლიქტის ნიადაგზე, ცეცხლსასროლი იარაღით ჭრილობები მიაყენა დაზარალებულს, რომელიც შემთხვევის ადგილზე გარდაიცვალა. ბრალდებული ასევე, უკანონოდ ინახავდა დიდი ოდენობით ნარკოტიკულ საშუალება „მეტადონს“.
სამართალდამცველებმა ბრალდებული იმავე დღეს დააკავეს. მას ბრალდება საქართველოს სისხლის სამართლის კოდექსის 108-ე მუხლით (განზრახ მკვლელობა), 236-ე მუხლის მესამე და მეოთხე ნაწილებით (ცეცხლსასროლი იარაღის მართლსაწინააღმდეგო შეძენა, შენახვა, ტარება) და 260-ე მუხლის მეორე ნაწილის „ა“ ქვეპუნქტით (დიდი ოდენობით ნარკოტიკული საშუალების უკანონო შეძენა-შენახვა) წარედგინა, რაც სასჯელის სახედ და ზომად 15 წლამდე თავისუფლების აღკვეთას ითვალისწინებს. პროკურატურამ ბრალდებულის მიმართ აღკვეთის ღონისძიების სახით პატიმრობის გამოყენების შუამდგომლობით სასამართლოს უკვე მიმართა“, - ნათქვამია ინფორმაციაში.
მკვლელობაში ბრალდებული მალხაზ ბაღათელიაა. ის ამ დრომდე დუმილის უფლებას იყენებს. არ ეთანხმება ბრალდებას. „ტვ პირველის“ ინფორმაციით, მკვლელობის მიზეზი წარსულში არსებული კონფლიქტია. ასევე ცნობილია, რომ ბაღათელია და მოკლული ბოკუჩავა ბავშვობის მეგობრები და ბიზნესპარტნიორები იყვნენ. ირკვევა, რომ ვაჭრობდნენ ავტო ნაწილებით. მოკლულიც და ბრალდებულიც ზუგდიდიდან არიან. ტელეკომპანიის ცნობით, ბაღათელიას მკვლელობა წინასწარ ჰქონდა დაგეგმილი და ამ მიზნით ბოკუჩავა თბილისში დაიბარა. ერთ-ერთი ვერსიით ბაღათელია ბოკუჩავას თანხის მითვისებას აბრალებდა, რაც მკვლელობის მოტივი გახდა.
„ჩემი დაცვის ქვეშ მყოფი კვლავ დუმილის უფლებას ინარჩუნებს. დღეს მოსამართლე აღკვეთის ღონისძიების საკითხს განიხილავს, რაც შეეხება პროკურატურას, დარწმუნებული ვარ პატიმრობას მოითხოვს“, - განაცხადა ადვოკატმა „ტვ პირველთან“.