თბილისის საქალაქო სასამართლოში სამსახურებრივი უფლებამოსილების ბოროტად გამოყენებისა და უკანონო შემოსავლის ლეგალიზაციის ფაქტზე ბრალდებული, თავდაცვის ყოფილი მინისტრის, ჯუანშერ ბურჭულაძის სასამართლო პროცესი გაიმართა.

დღევანდელ პროცესზე მხარეებმა შესავალი სიტყვა თქვეს. ბრალდების მხარის მოთხოვნით გამოსაკვლევ მტკიცებულებებს კიდევ 7 კომპიუტერული დისკი დაერთო, სადაც ბრალდებულების კომუნიკაციაა ასახული. ასევე, გამოსაკითხ პირთა რაოდენობას, ექსპერტებიც დაემატნენ.

"მხარეებმა წარვადგინეთ შესავალი სიტყვები. კერძოდ, განვმარტეთ რა ედებათ აღნიშნულ პირებს ბრალად, რა მტკიცებულებების საფუძველზე მოვახდენთ ჩვენი პოზიციის დადასტურებას. ასევე, ბრალდების მხარემ მოითხოვა დამატებითი მტკიცებულებების დართვა. ეს არის კომპიუტერული და სასაქონლო ექსპერტიზები. კონკრეტულად, ბრალდებულების პირადი ჩხრეკისას და მათგან ამოღებული მობილური ტელეფონებიდან გამოთხოვილი იქნა გარკვეული სახის ინფორმაცია. აგრეთვე, სასაქონლო ექსპერტიზის დასკვნა ეხება უშუალოდ ჯუანშერ ბურჭულაძის გარკვეული ქმედებების შეფასებას და მათი რეალური ღირებულებების დადგენას. შემდგომი პროცესიდან უკვე ბრალდების მხარე დაიწყებს მტკიცებულებათა აქტიურ კვლევას და ამ რეჟიმში გავაგრძელებთ მუშაობას." - აცხადებს პროკურორი ანა ლეკიაშვილი.