თავდაცვის სამინისტროსთან გამართულ ყოველწლიურ შეხვედრაზე სიტყვით გამოსვლისას ვლადიმერ პუტინმა განაცხადა, რომ ის მიზნები, რასაც მოსკოვი "სპეციალურ სამხედრო ოპერაციას" უწოდებს, "უპირობოდ" შესრულდება. ინფორმაციას The Guardian-ი ავრცელებს. 

"თუ მათ არ სურთ არსებითი განხილვა, მაშინ რუსეთი ბრძოლის ველზე თავის ისტორიულ მიწებს გაათავისუფლებს". 

პუტინმა ასევე განაცხადა, რომ აშშ-ის წინა ადმინისტრაციამ "განზრახ მიიყვანა ვითარება შეიარაღებულ კონფლიქტამდე" და დაამატა, რომ ვაშინგტონს სჯეროდა, თითქოს რუსეთი მოკლე დროში შეიძლებოდა დასუსტებულიყო, ან თუნდაც განადგურებულიყო.

შემდეგ, პუტინმა მკაცრად გააკრიტიკა ევროპელი ლიდერები და ისინი ჯო ბაიდენის ადმინისტრაციასთან ერთად მოქმედებაში დაადანაშაულა.

"ევროპის პატარა ღორები დაუყოვნებლივ ჩაერთნენ წინა ამერიკული ადმინისტრაციის საქმიანობაში, იმ იმედით, რომ ჩვენი ქვეყნის ნგრევით სარგებელს მიიღებდნენ," -თქვა პუტინმა.

პუტინის მკაცრი განცხადებები გაკეთდა მას შემდეგ, რაც აშშ-ის ოფიციალურმა პირებმა განაცხადეს, რომ ბერლინში უკრაინასთან ადრე გამართულმა მოლაპარაკებებმა ყველაზე რთული საკითხების დაახლოებით 90% გადაჭრა.

თუმცა კვლავ რჩება სერიოზული ეჭვები, არის თუ არა რუსეთის ლიდერი მზად, დათმობაზე წავიდეს თავის ფართო მოთხოვნებთან დაკავშირებით.

პუტინი არაერთხელ დაჟინებით მოითხოვდა, რომ კიევმა დათმოს აღმოსავლეთ დონბასის ის დარჩენილი ნაწილები, რომლებიც ჯერ კიდევ უკრაინის კონტროლის ქვეშაა - მოთხოვნა, რომელსაც თეთრი სახლი ზოგჯერ თითქოს უჭერდა მხარს, თუმცა უკრაინამ იგი კატეგორიულად უარყო.

მოსკოვი ასევე ითხოვს უკრაინის არმიის მკაცრ შეზღუდვას, უკრაინის ტერიტორიაზე დასავლური ჯარების აკრძალვას და დასავლეთის სამხედრო დახმარების შეწყვეტას.

ოთხშაბათს რუსმა ლიდერმა ასევე უარყო, რომ მოსკოვი ნატოს ტერიტორიაზე შეჭრას გეგმავს. მისი თქმით, პირიქით - ნატო ემზადება რუსეთთან შესაძლო სამხედრო დაპირისპირებისთვის, 2030 წლის პერსპექტივით.