აშშ-ის პრეზიდენტმა დონალდ ტრამპმა კარიბის ზღვის შემდეგ ნარკოტიკების წინააღმდეგ ბრძოლის ხმელეთზე დაწყება კიდევ ერთხელ დააანონსა.
თეთრ სახლში გაკეთებული განცხადებისას შტატების პრეზიდენტმა აღნიშნა, რომ სამიზნეში მხოლოდ ვენესუელა არ მოექცევა, ოპერაცია გავრცელდება ყველას წინააღმდეგ, ვინც შტატებში ნარკოტიკების შეტანას შეეცდება.
„ზღვიდან შემომავალი ნარკოტიკების 96% გავანადგურეთ. ყველა ნავი, რომელსაც ხედავთ, რომ ფეთქდება, 25 ათასი ამერიკელის სიცოცხლის გადარჩენას ნიშნავს. ახლა ხმელეთზეც ვიწყებთ. ეს ბევრად მარტივია. საქმე მხოლოდ ვენესუელაში დარტყმებს არ ეხება. ეს შეიძლება მხოლოდ ვენესუელაში არ იყოს, არამედ, შესაძლოა, დარტყმები იმ საშინელ ადამიანებზე განხორციელდეს, რომლებსაც ნარკოტიკები აშშ-ში შემოაქვთ და ჩვენს ხალხს კლავენ. კოლუმბიაში კოკაინის სულ მცირე სამი საწარმოა. ეს კიდევ სხვა ქვეყანაა. დარტყმები იმ ადამიანების წინააღმდეგ განხორციელდება, რომლებსაც ნარკოტიკები ამერიკის შეერთებულ შტატებში შემოაქვთ“, - განაცხადა ტრამპმა.