საქართველოს მსგავსმა სახელმწიფოებმა თავი უნდა დაიცვან საგარეო ჩარევისგან.  ეს არ არის მარტივი. ბრიუსელისა და ვაშინგტონის მიერ ზეწოლა დიდია და ეს სწორედ სამხრეთ კავკასიის გეოგრაფიიდან მომდინარეობს, – ამის შესახებ კოლუმბიის უნივერსიტეტის პროფესორმა, ეკონომისტმა ჯეფრი საქსმა ტელეკომპანია „იმედის“ ეთერში განაცხადა.

მისივე თქმით, გამოსავალია სამხრეთ კავკასიური სახელმწიფოების ერთიანობა.

ამასთან, როგორც ჯეფრი საქსმა აღნიშნა, ქართველები ხვდებიან, რომ ეგრეთ წოდებული დასავლური „ენჯეოები“ ამერიკული „დიფ სთეითის“ ნაწილი არიან.

„მათ აფინანსებენ ამერიკის შეერთებული შტატების ხელისუფლებასთან დაკავშირებული სააგენტოები, მათი ინტერესთა სრული თანხვედრის ფონზე, იქნება ეს NED, IRI, NDI, ღია საზოგადოების ფონდი თუ სხვა. საქართველოს ხელისუფლება ამას როცა აპროტესტებს და აცხადებს, რომ არ სურს ვაშინგტონისა და ლონდონის დაკრულზე ცეკვა, ამერიკული, ბრიტანული და მათი მოკავშირე დაზვერვის სამსახურების კარნახით ქმედება, იწყება საუბარი საქართველოში დემოკრატიულ უკუსვლაზე, სიტყვის თავისუფლების შეზღუდვაზე. გაერო-ს ქარტიის თანახმად, სახელმწიფოებს სხვათა შიდა საქმეებში ჩარევის უფლება არ აქვთ. ევროპარლამენტარები თბილისში, რუსთაველზე ანტისამთავრობო აქციაზე არ უნდა იდგნენ, ამერიკელი სენატორები კი მაიდანზე არ უნდა ერეკებოდნენ აქციის მონაწილეებს, არავის მოეწონებოდა ვაშინგტონში ჩინელი პოლიტიკოსების გამოჩენა და მათ მიერ კაპიტოლიუმზე შეტევის წახალისება. ეს მარტივია. აშშ-მა უნდა შეწყვიტოს საქართველოში მედიის, პოლიტიკოსების დაფინანსება, „ენჯეო“ არ არის „ენჯეო“, როდესაც ის ამერიკული, ბრიტანული ან ბრიუსელის „დიფ სთეითის“ კარნახით მოქმედებს. საქართველოს მსგავსმა სახელმწიფოებმა თავი უნდა დაიცვან საგარეო ჩარევისგან. ეს არ არის მარტივი. ბრიუსელისა და ვაშინგტონის ზეწოლა დიდია და ეს სწორედ სამხრეთ კავკასიის გეოგრაფიიდან მომდინარეობს. ჩემი აზრით, გამოსავალია სამხრეთ კავკასიური სახელმწიფოების ერთიანობა, მათ შორის თანამშრომლობის მაღალი ხარისხით, საერთო მცდელობით, შემცირდეს უცხო სახელმწიფოთა გავლენები რეგიონში.

ეს ძალიან ბრძნული იქნებოდა, მაგრამ, სამწუხაროდ, რთულია რეალობაში ამის გატარება. ამ რეგიონში ძალიან მნიშვნელოვანი სახელმწიფოებია, რუსეთი, ირანი, თურქეთი, საუდის არაბეთი. ვისურვებდი, მენახა სამხრეთ კავკასიის რეგიონი, რომელიც მოქმედებს ერთიანი, გრძელვადიანი ეკონომიკური სტრატეგიის მიხედვით. სამხრეთ კავკასია არ უნდა იყოს ვინმეს საკბილე, არ უნდა იყოს იძულებული, აირჩიოს ერთი ან მეორე ბანაკი, არც ნატო და არც ევროკავშირი. სამხრეთ კავკასია უნდა მოქმედებდეს რეგიონში ათასობით წლის განმავლობაში მცხოვრები ხალხების ინტერესებით, მეზობლებთან მშვიდობიანი, კარგი ეკონომიკური ურთიერთობების, ინვესტიციების პირობებში, გეოპოლიტიკური თამაშების მიღმა. ეს შესაძლოა, იდეალისტურია, მაგრამ სწორედ ამ სტრატეგიას გირჩევთ“, – აღნიშნა ჯეფრი საქსმა.

როგორც ჯეფრი საქსმა აღნიშნა, არ არსებობს შანსი, რომ საქართველო ნატო-ს წევრი იქნება, რადგან, მისი თქმით, ამას რუსეთი არასოდეს დაუშვებს.

„არ არსებობს შანსი, რომ საქართველო როდისმე ნატოს წევრი იქნება, შანსი არ არის, ამას რუსეთი არასოდეს დაუშვებს. შეგიძლიათ, წარმოიდგინოთ, რომ ჩინეთმა ან რუსეთმა მექსიკას სანქციები დაუწესონ, მის მიწაზე, ამერიკის საზღვართან რომელიმეს სამხედრო ბაზების არგანთავსების მიზეზით? ეს ხომ სიგიჟეა. ამავე დროს, მაქვს ასეთი სიგიჟის მოსმენის გამოცდილება ბუქარესტში, ნატო-ს სამიტის შემდეგ, 2008 წელს. სრული სიგიჟე გამოაცხადეს, რომ საქართველო ნატო-ს წევრი გახდებოდა. მიმიწვიეს სააკაშვილის სიტყვით გამოსვლის მოსასმენად, ალბათ, თუ სწორად მახსოვს, 2008 წლის მაისში, ნიუ-იორკში.

სააკაშვილი ამტკიცებდა, რომ ნატო-ში შევიდოდა, საქართველო ევროპის შუაგულში იყო, ნიუ-იორკში კი ეს იდიოტები მას აქეზებდნენ. განცვიფრებული ვიყავი. მეუღლეს დავურეკე და ვუთხარი, რომ ალბათ ცხოვრებაში ყველაზე დიდი სიგიჟე მოვისმინე და სააკაშვილი იყო სრული შეურაცხადი. რამდენიმე კვირაში ომიც დაიწყო, ომი საქართველოში და მთელი ეს ილუზიები საპნის ბუშტივით გასკდა. ასე, რომ, საქართველო, ისევე როგორც უკრაინა, ნატო-ს წევრი სახელმწიფოები არ იქნებიან. ეს არის ამ თავგადასავლის დასასრული, მაგრამ, როგორც ჩანს, კონგრესში ეს ჯერ არ იციან, ისინი ხომ რეალობას ემალებიან“, – აღნიშნა ჯეფრი საქსმა.

ამასთან, ჯეფრი საქსს კითხვა დაუსვეს უკრაინის პრეზიდენტის ვოლოდიმირ ზელენსკისთან დაკავშირებით, რაზეც ჯეფრი საქსმა აღნიშნა:

„ზელენსკის საქართველოს შიდა საქმეებში ჩარევის გარდა, წესით, სხვა საქმე უნდა ჰქონდეს, მაგრამ ზელენსკი ხომ ამერიკული და ბრიტანული დაზვერვის მარიონეტია. ტრამპი მის თავიდან მოშორებას ცდილობს, მაგრამ ზელენსკი იმ სისტემის ნაწილია, რომელიც სწორედ ამერიკელებმა შექმნეს 2014 წლის თებერვალში სახელმწიფო გადატრიალებისას უკრაინაში. ზელენსკის ყველა წინამორბედიც 2014 წლიდან ამერიკის კარგი მოსწავლე იყო, „დიფ სთეითის“ კარგი მოსწავლე. ყველაფერი კი ახლა თავდაყირა დგება. ტრამპს სურს ამ ომის დასრულება. ეს ომი უდიდესი ჩავარდნაა ამერიკისა და ბრიტანეთისთვის, იმ სახელმწიფოებისთვის, რომელთაც ჯერ კიდევ 1990-იან წლებში გადაწყვიტეს, რომ უკრაინა ნატო-ში გაეწევრიანებინათ. მათ ეს მარტივი ეგონათ, სულ არ ელოდნენ ომს, რომელსაც უკრაინა წააგებდა, მაგრამ ეს გახლავთ მოცემულობა. ახლა კი ამერიკული „დიფ სთეითის“ ნაწილი ამ ომისგან თავის დაღწევას ცდილობს. ზელენსკის კი სხვა გზა არ აქვს, ის სწორედ ამ ომისთვის განაწესეს ადგილზე. როგორც ბორის ჯონსონმა თქვა, უკრაინის ომი არის დასავლური ჰეგემონიის დაცვისთვის წარმოებული ომი, ეს სიგიჟეა, მაგრამ სწორედ ასე მიაჩნიათ, ზელენსკი კი ასრულებს მის მოვალეობას, მიუხედავად იმისა, რომ უკრაინელთა დიდ ნაწილს ეს ომი არ სურს“, – აღნიშნა ჯეფრი საქსმა.

ჯეფრი საქსს ასევე კითხვა დაუსვეს, „რა მიზანს ემსახურება ბრალდება, რომ საქართველო ზედმეტად დაუახლოვდა რუსეთის ფედერაციას“, რაზეც ჯეფრი საქსმა აღნიშნა:

„ყველას ვურჩევ, ამა თუ იმ რეგიონზე საუბრისას, ჯერ რუკას დახედოს. საქართველო სამხრეთ კავკასიის ნაწილია. საქართველოს მსგავს სახელმწიფოს ყველა რეგიონულ, ძლიერ მეზობელთან კარგი ურთიერთობა უნდა ჰქონდეს. საქართველოს შეუძლია, იყოს ჩრდილოეთსა და სამხრეთს, აღმოსავლეთსა და დასავლეთ შორის სავაჭრო დერეფანი. საქართველო არის ტურისტული ჰაბი, უძველესი ცივილიზაცია დახუნძლული ბევრი საინტერესო ტურისტული საგანძურით, უმშვენიერეს მიწაზე. მოცემულობა, რომ ევროპამ უნდა უკარნახოს საქართველოს ან მეზობელ სომხეთს ან აზერბაიჯანს, ვისთან ივაჭრონ, არის აბსურდული და სამწუხარო. საქართველოს მსგავს ქვეყანას უნდა ჰქონდეს კარგი სავაჭრო ურთიერთობები ყველა მეზობელთან. სწორედ ასე მუშაობს ეკონომიკა. იმპერია სხვა საკითხია – იმპერიის გადმოსახედიდან, სამხრეთ კავკასია უნდა დაიყოს, „დაყავი და იბატონეს“ პრინციპით. როდესაც ევროპა აცხადებს, რომ სურს, სტრატეგიული კონტროლი ჰქონდეს რეგიონზე, ეს ყოვლად არანორმალური ამბიციაა, რომელსაც იზიარებს, მათ შორის ამერიკა და რომლის მიხედვითაც, უკვე რამდენიმე ათწლეულია, ცენტრალური სადაზვერვო სააგენტო საქმიანობს რეგიონში. ამ იმპერიული თვალსაზრისის გათვალისწინებით კი, მათთვის ნაკლებად საინტერესოა საქართველოს ან სამხრეთ კავკასიის ეკონომიკა. დასავლეთის ერთადერთი ინტერესია მხოლოდ ქაოსის, შიშის დათესვა, მათ შორის სანქციების გამოყენებით. გამომდინარე აქედან, მგონია, ევროპამ უნდა შეწყვიტოს უკანონო ზეწოლა, სანქციები. სანქციების დაწესება მხოლოდ გაერო-ს ქარტიის საფუძველზეა შესაძლებელი, ევროკავშირს კი არ აქვს უფლება, გაერო-ს გვერდის ავლით საქართველოს სანქციები დაუწესოს“, – აღნიშნა ჯეფრი საქსმა.