წლების განმავლობაში რისთვის გვამზადებდნენ და რა სურდათ ჩვენი ქვეყნისგან მიეღოთ რეალურად, ცნობილი გახდა 2022 წლის შემდეგ. ყოველ წელს, ყოველთვიურად, დღემდე ვხედავთ რა დონეზე იშიფრება ის აგენტურა, ქვეყნის შიგნით თუ გარეთ, ვისაც ჩვენი ქვეყნის ცეცხლის ალში გახვევა სურდა, - განაცხადა გადაცემაში „იმედის კვირა" საპარლამენტო უმრავლესობის ლიდერმა ირაკლი კირცხალიამ ერთწლიან ხელოვნური პროტესტზე საუბრისას.

მისი თქმით, საქართველოს წინააღმდეგ დაიქოქა პროპაგანდის მანქანა და ამოქოქა ყველა აგენტურა დესტაბილიზაციის მოწყობის მიზნით.

„ჩვენი პასუხი იყო მკაფიო, რომ ჩვენ ვერ ვიქცევით ვერავის სტატისტიკად, რომ ჩვენ ჩვენი სისხლი უკვე დავღვარეთ და ჩვენს შეცდომებზე ვისწავლეთ, ჩვენმა ისტორიამ გვასწავლა როგორ უნდა ვიაროთ. ეს გზა არის მხოლოდ სამშვიდობო გზა. ეს ვერ აიტანეს, დაქოქეს ყველაზე დიდი მანქანა პროპაგანდის, გარე პოლიტიკის, ამოქოქეს ყველა აგენტი ქვეყნის შიგნით და არც ერთი შანსი არ გაუშვეს ხელიდან, რომ ქვეყანაში მოეწყოთ დესტაბილიზაცია. ამ სცენარის განხორციელებისთვის იყენებდნენ ენჯეოებს, რეალურად შავი ფულის გამტარ შპს-ებს და ე.წ პოლიტიკური პარტიებს", - განაცხადა საპარლამენტო უმრავლესობის ლიდერმა.

ირაკლი კირცხალიას განცხადებით, უცხოელმა აქტორებმა ფეხქვეშ გათელეს პარტნიორობა და ვენის კონვენცია.

„პირდაპირ ვხედავდით ანტისამთავრობო მიტინგებზე სხვადასხვა პოლიტიკური თანამდებობის პირებს, რომლებიც გამოდიოდნენ დესტრუქციულ ძალასთან ერთად და იქ დგომით სახელმწიფოს დამხობას მოითხოვდნენ. ყველას გვახსოვს მათი რადიკალიზმის მხარდამჭერი განცხადებები, ყველაფერი აკეთეს, რომ საარჩევნო კამპანიაში ყოფილიყვნენ ჩართული, ფეხქვეშ გათელეს ვენის კონვენცია, ფეხქვეშ გათელეს პარტნიორობა. ხშირად ისმებოდა კითხვა, რას აპირებთ, როცა მთელი ევროპა ასე საუბრობს? ჩვენ ვეუბნებოდით, მთელი ევროპა არ არის ვიღაც არარჩეული ბიუროკრატი და აქ დანიშნული ელჩი, რომელიც დავალებას ასრულებს. ამ ბინძურ რიტორიკას ვუპირისპირებდით სიმართლეს, ფაქტებს.

ვგრძნობდით ყოველთვის, რა უნდოდა, რა სჭირდებოდა ჩვენს ქვეყანას და ასე ქართველ ღირსეულ ხალხთან ერთად დავამარცხეთ ეს ბოროტი ძალა. კოსი, კალასი, ასეთი ლიდერშიფი დღეს არიან და ხვალ არა. კარგად დაიმახსოვრონ - ამ არაფორმალური მმართველების ხელდასმული პოლიტიკოსების გადასაწყვეტი არ არის, ჩვენი ქვეყანა სად გაწევრიანდება და სად არა. შანტაჟის უფლებას არ მივცემთ არავის", - განაცხადა კირცხალიამ.

საპარლამენტო უმრავლესობის ლიდერმა აღნიშნა ისიც, რომ ასოცირების ხელშეკრულებით ნაკისრი ვალდებულების 60%-ზე მეტი საქართველოს შესრულებული აქვს და 2028-2030 წელს ქვეყანა ყველაზე მეტად მომზადებული იქნება ევროკავშირის წევრობისთვის.