ისრაელის პრემიერ-მინისტრმა, ბენიამინ ნეთანიაჰუმ მის წინააღმდეგ კორუფციის საქმესთან დაკავშირებით მიმდინარე საქმეზე პრეზიდენტს შეწყალების თხოვნით მიმართა. როგორც პრემიერ-მინისტრის ადმინისტრაციაში აცხადებენ, შეწყალების თხოვნით განაცხადი პრეზიდენტის კანცელარიაში დღეს ჩააბარეს.
პრეზიდენტის ოფისმა კი ამ ფაქტს „ექსტრაორდინალური მოთხოვნა" უწოდა.
ბენიამინ ნეთანიაჰუ ქვეყნის ისტორიაში ერთადერთი მოქმედი პრემიერია, რომლის წინააღმდეგაც სისხლის სამართლის საქმე მიმდინარეობს. მას ბრალი აქვს წაყენებული თაღლითობაში, ნდობის ბოროტად გამოყენებასა და მდიდარი პოლიტიკური მხარდამჭერებისგან ქრთამის აღების სამ სხვადასხვა ეპიზოდში, რომელიც მან მათთვის სახარბიელო პირობების შექმნისთვის მიიღო. ნეთანიაჰუ ყველა ბრალდებას უარყოფს.
ვიდეომიმართვაში პრემიერ-მინისტრი ამბობს, რომ მის წინააღმდეგ მიმდინარე სასამართლო პროცესმა ორად დაყო ქვეყანა და შეწყალება მას ეროვნული ერთიანობის აღდგენაში დაეხმარება. ასევე მიაჩნია, რომ მოთხოვნა, კვირაში სამჯერ გამოცხადდეს სასამართლოზე, სირთულეებს უქმნის ქვეყნის მართვაში.