რუსეთმა კიევის ოლქის ქალაქ ვიშგოროდი დრონებით დაარტყა, რის შედეგადაც მრავალი საცხოვრებელი შენობა დაზიანდა, 19 ადამიანი დაიჭრა, მათ შორის ბავშვები და ერთი ადამიანი დაიღუპა, - ამის შესახებ უკრაინის პრეზიდენტი, ვოლოდიმირ ზელენსკი სოციალურ პლატფორმა X-ზე წერს.

მისი ინფორმაციით, ქალაქში საგანგებო რეაგირების სამუშაოები მიმდინარეობს. ასევე არიან დაშავებულები დნეპრისა და ხარკოვის ოლქებში. დარტყმები ასევე განხორციელდა ოდესის, სუმის და ხერსონის ოლქებში.

„ღამით რუსებმა უკრაინის ტერიტორიას 122 დრონით და ორი ბალისტიკური რაკეტით დაარტყეს. ასეთი თავდასხმები ყოველდღიურად ხდება. მხოლოდ ამ კვირაში რუსებმა ჩვენი ხალხის წინააღმდეგ თითქმის 1400 თავდასხმის დრონი, 1100 მართვადი საჰაერო ბომბი და 66 რაკეტა გამოიყენეს. სწორედ ამიტომ უნდა გავაძლიეროთ უკრაინის მდგრადობა ყოველდღიურად. რაკეტები და საჰაერო თავდაცვის სისტემები აუცილებელია და ასევე მნიშვნელოვანია ჩვენს პარტნიორებთან აქტიური მუშაობა მშვიდობისთვის. გვჭირდება რეალური, საიმედო გადაწყვეტილებები, რომლებიც ხელს შეუწყობს ამ ომის დასრულებას“, - წერს ზელენსკი.