დროა, ევროპამ გაყინული აქტივების შესახებ გადაწყვეტილება მიიღოს, თუ რუსეთი დრონებითა და რაკეტებით დარტყმებს არ შეწყვეტს, - ასე ეხმაურება უკრაინის პრეზიდენტი, ვოლოდიმირ ზელენსკი რუსეთის მიერ კიევზე განხორციელებულ მასშტაბურ სარაკეტო იერიშს.

„კიევსა და სხვა რეგიონებში სამაშველო სამსახურები მუშაობას განაგრძობენ. რუსებმა დაახლოებით 36 რაკეტა და 600 დრონი გაუშვეს. თავდასხმის მთავარი სამიზნე ენერგეტიკული ინფრასტრუქტურა და სამოქალაქო ობიექტები იყო. ბოლო მონაცემებით, სამი ადამიანი დაიღუპა და ათობით დაშავდა", - წერს ვოლოდიმირ ზელენსკი X-ზე.

უკრაინის პრეზიდენტმა, ვოლოდიმირ ზელენსკიმ მოკავშირეებს რუსეთს ზეწოლის გაძლიერებისკენ მოუწოდა.

„უნდა ვიმუშაოთ იმის უზრუნველსაყოფად, რომ ჩვენი საჰაერო თავდაცვისთვის საკმარისი რაოდენობის რაკეტები გვქონდეს და რუსეთზე ზეწოლა შენარჩუნდეს. ომის დასასრულებლად საჭირო ნაბიჯები ყველა ჩვენს პარტნიორთან აუცილებლად უნდა განვიხილოთ", - აცხადებს უკრაინის პრეზიდენტი.

საქართველოს სტრატეგიული ანალიზის ცენტრის გეოპოლიტიკური კვლევების ხელმძღვანელი, ვახტანგ მაისაია ამბობს, რომ ზელენსკის მკაცრი ტონი აბსოლუტურად მართებულია, რადგან ევროპა ამ პროცესს ძალიან წელავს.

„ზელენსკის ეს კატეგორიული ტონი აბსოლუტურად მართებულია, რადგან ევროკავშირის წარმომადგენლები ამ საკითხზე დიდი ხანია ლაპარაკობენ, მაგრამ საქმე-საქმეზე რომ მიდგა, რატომღაც არ სრულდება. შესაბამისად, ზელენსკის მობეზრდა ასეთი გაუთავებელი დაპირებების მოსმენა. თან ახლა უკრაინას ეს განსაკუთრებით სჭირდება, რათა უკრაინულმა სამხედრო ძალებმა ოკუპანტების მოგერიება შეძლონ. ასე რომ, ზელენსკის ეს ტონი ნამდვილად მისაღები და სწორია",- განაცხადა ვახტანგ მაისაიამ „რეზონანსთან".

აღსანიშნავია ისიც, რომ უკრაინის ტერიტორიაზე რუსეთის მხრიდან შეტევები გრძელდება.

კიევის საქალაქო-სამხედრო ადმინისტრაციის ხელმძღვანელმა, ტიმურ ტკაჩენკომ მოსახლეობას თავშესაფრებში დარჩენისკენ მოუწოდა.

ტკაჩენკოს ცნობით, ღამით რუსების იერიშების შედეგად კიევში საცხოვრებელი შენობები დაზიანდა. ბოლო მონაცემებით, ერთი ადამიანი დაიღუპა და 11 დაშავდა.

ამასთან, უკრაინული მედიის ინფორმაციით, უკრაინამ კრასნოდარის მხარეში ნავთობგადამამუშავებელ ქარხანას დრონებით დაარტყა.

მათივე ინფორმაციით, დრონებით თავდასხმის შედეგად აფიპსკის ნავთობგადამამუშავებელი ქარხნის ტერიტორიაზე ხანძარი გაჩნდა.

ადგილობრივი მოსახლეობის ცნობით, ქარხნის მიმდებარედ აფეთქებების ხმა ისმოდა.

რუსეთის ხელისუფლებას თავდასხმის შესახებ კომენტარი ჯერჯერობით არ გაუკეთებია.