21-წლიანი კარიერის ხმაურიანი დასასრული - კვლავ აქტიურად განიხილება სპორტის სასახლეში გიორგი შერმადინის გამოსამშვიდობებელი სიტყვა. კალათბურთელმა უკრაინასთან მატჩის შემდგომ პრემიერ ირაკლი კობახიძეს მადლობა გადაუხადა, რასაც სპორტის სასახლის ტრიბუნიდან სტვენა და შეძახილები მოჰყვა.

კრიტიკოსები კალათბურთელს პოლიტიკაში წასვლასაც კი უწინასწარმეტყველებენ. „ოცნებაში" კი აცხადებენ, რომ შერმადინს მთელი დარბაზი ტაშს უკრავდა, მხოლოდ „30 ნაცი აპროტესტებდა რაღაცას".

საქართველოს საკალათბურთო ნაკრებმა მსოფლიოს 2027 წლის ჩემპიონატის შესარჩევი ეტაპი თბილისში, უკრაინასთან მატჩით გახსნა. „ჯვაროსნები" 9 ათასი გულშემატკივრის წინაშე დაძაბულ ბრძოლაში 79:92 დამარცხდნენ. შერმადინმა ამ მატჩისას გადაუხადა მადლობა პრემიერს.

„ძალიან დიდი მადლობა მინდა გადავუხადო ჩვენს სახელწიფოს ბატონი პრემიერის მეთაურობით. დიდი მადლობა ბატონო პრემიერო, რასაც სპორტისთვის აკეთებთ",- განაცხადა შერმადინა გამოსამშვიდობებელ სიტყვაში.

„კიდევ ერთი მომავალი სპეორტსმენი დეპუტატი", „ბარემ პარლამენტი გადაიტანეთ სპორტის სასახლეში", „ალბათ კარიერის ბოლოს პარლამენტამდე გზას იკვალავს", საერთოდ რა შუაშია აქ პრემიერი და მერე მისთვის მადლობის ხდა?" „ერთი მადლობით დაამსხვრია მოპოვებული სიყვარული" - წერენ კრიტიკოსები.

„უკეთეს კარიერის დასასრულს ვერ ინატრებდა კაცი, მადლობა!" „შენ ეპოქა შექმენი კალათბურთში", „თქვენ ვინ გკითხავთ ვის გადაუხდის მადლობას და რატომ? ადამიანს ვეღარ გამოუხატავს თავისუფლად აზრი", - წერენ შერმადინის გულშემატკივრები.

დედაქალაქის მერი და ყოფილი ფეხბურთელი კახა კალაძე ცუდს ვერ ხედავს იმაში, რომ სპორტსმენმა სახელმწიფოს მიმართ მადლიერება გამოხატოს.

„ცუდი რა არის იმაში, როდესაც სპორტსმენი გამოხატავს მადლიერებას სახელმწიფოს მიმართ? ბოლო წლების განმავლობაში სახელმწიფომ სპორტის მიმართულებით ძალიან ბევრი კარგი საქმე გააკეთა. თქვენ როგორ ფიქრობთ, ის შედეგები, რაც მივიღეთ კალათბურთში, ფეხბურთში, ძიუდოში ან სპორტის სხვა სახეობებში, ეს შემთხვევით მოვიდა? ეს ყველაფერი არის ზუსტად იმის შედეგი, რომ სპორტსმენებმა იშრომეს თავდაუზოგავად, მათთვის შეიქმნა შესაბამისი ინფრასტრუქტურა, პირობები.

„ამას უდიდესი მნიშვნელობა აქვს სპორტსმენისთვის. მაგალითად, ფეხბურთელი, რომელიც საზღვარგარეთ რომელიმე კლუბში თამაშობს და თავის ნაკრებში სათამაშოდ ჩამოდის, ფიქრობს მხოლოდ და მხოლოდ ერთ რამეზე - როგორ აჩვენოს თავისი საუკეთესო შესაძლებლობები. გიორგი შერმადინს მთელი დარბაზი ტაშს უკრავდა. არსებითი მნიშვნელობა არ აქვს, 30 ცალი „ნაცი" რაღაცას თუ გააპროტესტებს. საბედნიეროდ, მსგავსი ადამიანები არიან უმცირესობაში. ხოლო ქვეყნის უმრავლესობა რეალურად ხედავს, რა ხდება, რა პროცესები მიდის როგორც ქვეყნის შიგნით, ასევე ქვეყნის გარეთ. ლიბერალური ფაშიზმი მსოფლიოში მარცხდება და, რა თქმა უნდა, დამარცხებულია საქართველოშიც", - აღნიშნა კახა კალაძემ.

„გულშემატკივარი უნდა გიყვარდეთ და გესმოდეთ მათი არა მხოლოდ ტრიბუნაზე, არამედ ციხეშიც, არა მხოლოდ გალაღებული, არამედ ნაცემიც და უსამართლოდ დაჩაგრულიც. ვინაიდან მხოლოდ ასეთ ერთობას შეუძლია მოუტანოს წარმატება სპორტსაც და ქვეყანასაც!" - ასე მიმართავს „საქართველოს ევროპული ორბიტის" აღმასრულებელი დირექტორი, ნინო ლომჯარია ქართველ სპორტსმენებს და ქვეყანაში ბოლო ერთი წლის განმავლობაში განვითარებულ მოვლენებს ახსენებს.

მიხეილ სააკაშვილი კი იხსენებს, საქართველო ევრობასკეტზე პირველად რომ გავიდა, მაშინ შერმადინი მას ეფიცებოდა სიყვარულს.

„გუშინ კალათბურთზე ნათლად გამოჩნდა, რომ „ქოცებს" ყველგან ეწვით ფეხქვეშ მიწა. მათმა არხებმა მხოლოდ „ქარდების" დადება შეძლეს, ასე რომ, ვირტუალურ რეალობასაც ვეღარ ქმნიან. ევრობასკეტზე პირველად რომ გავედით, მაშინ ჩემს ნიკუშასთან ერთად ვიყავი თამაშზე და შერმადინმა გადამწყვეტი ქულები მოიპოვა. მაშინ მე მეფიცებოდა სიყვარულს. გაკვეთილია ყველასთვის, რომ მედროვეები არ უნდა გავიკაროთ მომავალში. ვულოცავ უკრაინას მოგებას თბილისში. ქართული კალათბურთი ისევ ამოიწევს, როცა „ქოცები" გაქრებიან!" - წერს სააკაშვილი.

საქართველოს კალათბურთის ფედერაცია მადლობას უხდის შერმადინს 21 წელი ნაკრებში თამაშისთვის და წერს, რომ კალათბურთელის კარიერის დასასრულის აღსანიშნად, ფედერაციის პრეზიდენტმა ვიქტორ სანიკიძემ 202-ნომრიანი მაისური გადასცა, „მისი ლეგენდარული კარიერის სიმბოლოდ" (202 თამაში). სპორტის მინისტრმა შალვა გოგოლაძემ სპეციალური პრიზით დააჯილდოვა, ფედერაციის გენერალურმა სპონსორმა კი ფულადი პრიზი გადასცა.

„21 წელი ნაკრებში, 6 ევრობასკეტი, 1 მსოფლიო ჩემპიონატი, 202 თამაში. მადლობა, შერმო!"- წერს კალათბურთის ფედერაცია.