ადამიანი, რომელმაც ექიმის და წამლის გარეშე დაამარცხა დემენცია და გამოჯანმრთელდა, რა თქმა უნდა, იმსახურებს დაბრუნდეს პენიტენციურ დაწესებულებაში, - განაცხადა საპარლამენტო პოლიტიკური ჯგუფის „ევროპელი სოციალისტების“ თავმჯდომარემ, ვლადიმერ ბოჟაძემ, მსჯავრდებული სააკაშვილის კლინიკიდან სასჯელაღსრულებით დაწესებულებაში გადაყვანასთან დაკავშირებით.

მისი თქმით, ვინაიდან სააკაშვილი არ საჭიროებს მკურნალობას, მან სასჯელი უნდა მოიხადოს ისე, როგორც სხვა პატიმრებმა.

მსჯავრდებული მიხეილ სააკაშვილი კლინიკა „ვივამედიდან“ N12 პენიტენციურ დაწესებულებაში 12 ნოემბერს დაბრუნდა.

„როგორც საზოგადოებისთვის ცნობილია, მსჯავრდებული მიხეილ სააკაშვილი, სტაციონარული სამედიცინო მომსახურების მიღების მიზნით, 2022 წლის 12 მაისს გადაყვანილ იქნა კლინიკა ვივამედში, სადაც ის ამ დრომდე იმყოფებოდა და მიეწოდებოდა შესაბამისი სამედიცინო მომსახურება.

საქართველოს კანონმდებლობის შესაბამისად, სამოქალაქო სექტორის საავადმყოფოდან პაციენტის პენიტენციურ დაწესებულებაში დაბრუნება ხორციელდება მისი ჯანმრთელობის მდგომარეობის გათვალისწინებით მკურნალი ექიმის გადაწყვეტილების საფუძველზე.

ვინაიდან, მსჯავრდებულ მიხეილ სააკაშვილის ჯანმრთელობის მდგომარეობა არის დამაკმაყოფილებელი და მას აღარ ესაჭიროება სტაციონარული მკურნალობა, ის გამოწერილ იქნა სამოქალაქო სექტორის კლინიკიდან და დაბრუნდა N12 პენიტენციურ დაწესებულებაში, სადაც საერთო წესით გააგრძელებს სასჯელის მოხდას“, - ნათქვამია პენიტენციური სამსახურის განცხადებაში.