მიხეილ სააკაშვილის ადვოკატი ვახტანგ ბარამაშვილი აცხადებს, რომ მისი დაცვის ქვეშ მყოფის „ვივამედიდან“ ციხეში გადაყვანის გადაწყვეტილების შესახებ ინფორმირებული არ იყო. კომენტარი მედიასთან მან სააკაშვილთან საპატიმროში შესვლამდე გააკეთა.

„პრეზიდენტ სააკაშვილის პოზიციაზე ციხეში გადმოყვანასთან დაკავშირებით არ ვარ ინფორმირებული. ეს პირველი შეხვედრა იქნება გადმოყვანის შემდეგ. მას შემდეგ, რაც გავივლით საკითხებს, შევთანხმდებით მათ შორის იმაზე, უნდა გავაკეთოთ თუ არა საჯარო ინტერვიუ. სრულიად მოულოდნელი იყო გადმოყვანა, არავინ ვიყავით ინფორმირებული, ყოველ შემთხვევაში, მე არ ვიყავი ინფორმირებული. გუშინ ვიყავი მასთან ვიზიტზე, დღის განმავლობაში მოვინახულე, ისიც არ იყო ინფორმირებული“, - განაცხადა ბარამაშვილმა.

მიხეილ სააკაშვილი N12 პენიტენციურ დაწესებულებაში 12 ნოემბერს დაბრუნდა.