დონალდ ტრამპის განცხადებებმა, სადაც ის მხარს უჭერს კიევს რუსეთისგან თავისი ყველა ტერიტორიის დაბრუნებაში, შვებისა და ეჭვის ნაზავი გამოიწვია - თითქოს აშშ-ის პრეზიდენტი მზად არის, ევროპას უფრო მეტი პასუხისმგებლობა გადააბაროს უკრაინის მხარდაჭერის საკითხში, - წერს საინფორმაციო სააგენტო Reuters-ი.

ტრამპის განცხადებები Truth Social-ზე იყო მკვეთრი და მნიშვნელოვანი რიტორიკული ცვლილება აშშ-ის ლიდერისთვის, რომელიც ადრე მოუწოდებდა უკრაინას, უარი ეთქვა ტერიტორიაზე ომის დასასრულებლად.

მაგრამ დაუყოვნებლივ არ იყო მკაფიო, გაამყარებდა თუ არა ის თავის სიტყვებს აშშ-ის პოლიტიკის ცვლილებით, რაც არის გაურკვევლობა, რომელმაც შესაძლოა ევროპას დააკისროს უკრაინის მეტი საჭიროებების დაკმაყოფილება შეიარაღებითა და დაფინანსებით, ვაშინგტონის როლის შემცირების ფონზე.

„ვფიქრობ, ხალხი გამხნევებულია, რადგან ეს იმაზე მიუთითებს, რომ კონფლიქტის შესახებ მისი გაგება შეიცვალა“, - განაცხადა RUSI-ის საერთაშორისო უსაფრთხოების საკითხების დირექტორმა, ნილ მელვინმა.

გერმანიის საგარეო საქმეთა მინისტრი, იოჰან ვადეფული მიესალმა ტრამპის განცხადებას და აღნიშნა, რომ ევროპის გააქტიურების დრო დადგა.

ორმა ოფიციალურმა პირმა, რომლებიც Reuters-ს ანონიმურობის პირობით ესაუბრნენ, განაცხადა, რომ ტრამპი შესაძლოა მიანიშნებდეს, რომ უკრაინის დახმარება ახლა ევროპის საქმეა.

„ის თითქოს გვემშვიდობება, არა? მაგრამ ეს ხვალ შეიძლება შეიცვალოს. ნებისმიერ შემთხვევაში, ვიცით, რა უნდა გავაკეთოთ“, - თქვა ევროპელმა ოფიციალურმა პირმა.

აღმოსავლეთ ევროპელმა მაღალი რანგის დიპლომატმა განაცხადა, რომ ტრამპის კომენტარები უკრაინის შესახებ მიზნად ისახავდა იმის ჩვენებას, რომ „ის დისტანცირებას იწყებს, იმ მესიჯის გაგზავნით, რომ ეს ევროპის საკითხია“.