საკადრო გადაადგილებები ივანიშვილის რეჟიმში შედეგს ვერ მოიტანს, იქნება ეს შევარდნაძის დროინდელი მინისტრების დანიშვნა, თუ ადგილობრივი „ოცნების“ ლიდერების, დასავლეთი არ თანამშრომლობს ავტოკრატიულ ხელისუფლებასთან - ამის შესახებ „ნაციონალური მოძრაობის“ ერთ-ერთმა ლიდერმა, ლევან ბეჟაშვილმა ახალი ელჩების დანიშვნასთან დაკავშირებით განაცხადა.
ლევან ბეჟაშვილმა „ქართuლი ოცნების“ ხელისუფლების საგარეო ურთიერთობები შეაფასა როგორც ფიასკო.
„ჩვენი დასავლელი პარტნიორები, არცერთი სახელმწიფო, არ ურთიერთობენ ივანიშვილის ავტოკრატიულ რეჟიმთან, ამიტომ, ბუნებრივია, ისინი ცდილობენ, საკადრო გადაადგილებებით რაღაც მიმართებით გარკვეული ნაბიჯები გადადგან, მაგრამ, ცხადია, რომ არცერთი ჩვენი დასავლელი და ამერიკელი პარტნიორი არ აპირებს რეჟიმთან თანამშრომლობას. მათ არავინ არ ესაუბრება, ამიტომაც, ნებისმიერი საკადრო გადაადგილება, იქნება ეს შევარდნაძის დროინდელი მინისტრების დანიშვნა თუ ადგილობრივი “ოცნების” ლიდერების განმწესება საზღვარგარეთ, შედეგს არ მოიტანს. მთავარი, რაც უნდა შეასრულოს “ოცნებამ” არის ის, რაც ევროსაბჭომ და ევროკავშირმა განსაზღვრა, მათ უნდა გადადგან კონკრეტული ნაბიჯები, აღიარონ ქართველი ხალხის ნაბიჯები, აღიარონ ქართველი ხალხის სუვერენიტეტი, ხელისუფლების წყარო არის ქართველი ხალხი, დანიშნონ ვადამდელი საპარლამენტო არჩევნები და უზრუნველყონ ამ ქვეყანაში კანონიერება და სამართლიანობა“, - განაცხადა ლევან ბეჟაშვილმა.
ცნობისთვის, გერმანიის ფედერაციულ რესპუბლიკაში საქართველოს საგანგებო და სრულუფლებიან ელჩად ალექსანდრე კარტოზია დაინიშნა. ნატო-ში საქართველოს წარმომადგენლად კი - ირაკლი ბერაია.