ახალგაზრდა ბრიტანელი გოგო, რომელიც ტაილანდში მოგზაურობისას გაუჩინარდა, საქართველოში 14 მაისს ნარკოტიკების შემოტანის მცდელობისთვის დააკავეს და ახლა, არც მეტი არც ნაკლები, 20 წლამდე ან სამუდამო პატიმრობა ემუქრება.

საქართველოს შინაგან საქმეთა სამინისტროს ცნობით, 18 წლის ბრიტანელი თბილისის საერთაშორისო აეროპორტში დააკავეს, როცა ქვეყანაში 12 კგ კანაფის და 2 კგ კანაფის კონცენტრატის კონტრაბანდის გზით შეტანას ცდილობდა.

მას ბრალი ნარკოტიკების უკანონო შენახვასა და ქვეყანაში მათი უკანონოდ შემოტანაში წაუყენეს. 18 წლის ახალგაზრდა სამშაბათს თბილისის სასამართლოში წარსდგა და წინასწარი პატიმრობა შეეფარდა.

მისმა ადვოკატმა გირაო მოითხოვა, თუმცა მოსამართლემ ეს მოთხოვნა არ დააკმაყოფილა.

მედიის ცნობით, ეჭვმიტანილმა სასამართლოს განუცხადა, რომ ორსულად იყო, თუმცა ნარკოტიკებთან დაკავშირებული ბრალდებების შესახებ მოსამართლის კითხვებს არ უპასუხა.

პროკურატურის განცხადებით, მისი თანამზრახველების იდენტიფიცირებისთვის გამოძიება მიმდინარეობს.

ბრიტანელმა სამართალდამცავებმა ადრე განაცხადეს, რომ მოზარდი სავარაუდოდ, ტაილანდში ყოფნის დროს გაუჩინარდა.

დიდი ბრიტანეთის საგარეო საქმეთა სამინისტროს წარმომადგენელმა განაცხადა: „ჩვენ მხარს ვუჭერთ საქართველოში დაკავებული ბრიტანელი ქალის ოჯახს და კონტაქტზე ვართ ადგილობრივ ხელისუფლებასთან".

ბრიტანული გამოცემის ცნობით, დარემის საგრაფოს ქალაქ ბილინგჰემში მცხოვრები ბელა მეი კელის ოჯახმა ადრე მიმართა საზოგადოებას მისი ადგილსამყოფლის შესახებ ნებისმიერი ინფორმაციის მისაღებად.

კელის დედამ, ლიან კენედიმ განაცხადა, რომ მისი ქალიშვილი აპრილში ფილიპინებში მოგზაურობდა, სანამ 3 მაისს ტაილანდში გაფრინდებოდა.

„ის აღდგომის შემდეგ მეგობართან ერთად ფილიპინებში გაფრინდა და იქ სამი კვირა დარჩა", - განუცხადა ქალბატონმა კენედიმ.

კენედიმ დასძინა: „ის უამრავ სურათს აქვეყნებდა და შემდეგ, დაახლოებით 3 მაისს, ტაილანდში გაემგზავრა".

„ბოლო შეტყობინება შაბათს, საღამოს 5:30 საათზე გამომიგზავნა, მითხრა, რომ მოგვიანებით ფეის ტაიმზე დამიკავშირდებოდა. ამ დროისთვის, რამდენადაც ვიცით, ეს იყო ბოლო შეტყობინება, რომელიც ვინმემ მიიღო."

კელის მამა და დეიდა, ნილი და კერი ტაილანდში გაფრინდნენ მის საპოვნელად მას შემდეგ, რაც ოჯახმა გაუჩინარების შესახებ ტაილანდისა და ბრიტანეთის პოლიციას აცნობა.

კლივლენდის პოლიციის წარმომადგენელმა სამშაბათს განაცხადა:

„ჩვენ ჯორჯიის შტატის ხელისუფლებისგან მივიღეთ დადასტურება, რომ ნარკოტიკებთან დაკავშირებული დანაშაულის ეჭვმიტანილის საფუძველზე 18 წლის ბილინგჰემელი ქალი დააკავეს და ის კვლავ პატიმრობაში რჩება", - იუწყება „ტელეგრაფი".