2025 წლის პირველ კვარტალში საქართველომ მოგზაურობიდან 826.0 მილიონი აშშ დოლარის შემოსავალი მიიღო, რაც წინა წლის ანალოგიურ პერიოდთან შედარებით, 2.3 პროცენტით მეტია, - ამის შესახებ საქართველოს ეროვნული ბანკის მიერ გავრცელებულ ინფორმაციაშია ნათქვამი.

„2025 წლის პირველ კვარტალში საერთაშორისო მოგზაურობიდან მიღებული შემოსავლების თვალსაზრისით, მაღალი პროცენტული ზრდა დაფიქსირდა აზერბაიჯანიდან - 19.8 პროცენტი და საუდის არაბეთიდან - 12.3 პროცენტი. ამავდროულად, სტატისტიკის მიხედვით, მაღალი ზრდის ტემპით გამოირჩევა ისრაელიდან მიღებული მოგზაურობიდან შემოსავლები, რომელმაც 2025 წლის პირველ კვარტალში, წინა წლის ანალოგიურ პერიოდთან შედარებით, 73.7%-იანი ზრდა აჩვენა და 114.2 მლნ აშშ დოლარს გაუტოლდა", - აღნიშნულია სებ-ის ინფორმაციაში.

მათივე ცნობით, საერთაშორისო მოგზაურობიდან მიღებულ შემოსავალში 2025 წლის პირველ კვარტალში ევროკავშირის ქვეყნების წილი 12.5 პროცენტით განისაზღვრა და 103.2 მილიონ აშშ დოლარს გაუტოლდა.

„კლების ტენდენციით ხასიათდება რუსეთიდან მიღებული მოგზაურობიდან შემოსავლები - 2025 წლის პირველ კვარტალში რუსეთიდან საქართველოში მოგზაურობით მიღებული შემოსავალი 17.2 პროცენტით შემცირდა", - აცხადებენ სებში.

საქართველოს შემოსავლები ტურიზმიდან 2025 წლის პირველ კვარტალში შემდეგნაირად ნაწილდება: აზერბაიჯანი - 48.6 მილიონი აშშ დოლარი; ბელარუსი - 15.9 მილიონი აშშ დოლარი; თურქეთი - 107.1 მილიონი აშშ დოლარი; ირანი - 27.2 მილიონი აშშ დოლარი; ისრაელი - 114.2 მილიონი აშშ დოლარი; რუსეთი - 141.8 მილიონი აშშ დოლარი; საუდის არაბეთი - 8.7 მილიონი აშშ დოლარი; სომხეთი - 28.2 მილიონი აშშ დოლარი; უკრაინა - 33.7 მილიონი აშშ დოლარი; ევროკავშირი - 103.2 მილიონი აშშ დოლარი; დანარჩენი ქვეყნები - 197.4 მილიონი აშშ დოლარი.