უკრაინის პარლამენტმა ქვეყანაში საომარი მდგომარეობის გახანგრძლივებას მხარი დაუჭირა.

უმაღლეს რადაში გამართული კენჭისყრისას საომარი მდგომარეობის 6 აგვისტომდე გახანგრძლივების გადაწყვეტილებას 357-მა დეპუტატმა დაუჭირა მხარი, წინააღმდეგ მხოლოდ ერთი დეპუტატი წავიდა.

ცნობისთვის, უკრაინაში საომარი მდგომარეობისა და საყოველთაო მობილიზაციის გახანგრძლივების ინიციატივით უმაღლეს რადას უკრაინის პრეზიდენტმა, ვოლოდიმირ ზელენსკიმ მიმართა. ამასთან, პარტია „ევროპული სოლიდარობის" წევრმა, ალექსეი გონჩარენკომ განაცხადა, რომ საომარი მდგომარეობისა და მობილიზაციის გახანგრძლივებას მხარს არ დაუჭერს, რადგან ხელისუფლებას არ ჩაუტარებია დემობილიზაცია და არ დაუდგენია სამხედრო სამსახურის ზღვრული ვადა. შეგახსენებთ, რუსეთის მიერ უკრაინის წინააღმდეგ ფართომასშტაბიანი ომის დაწყებიდან დღემდე უმაღლესმა რადამ უკვე მეთხუთმეტედ დაუჭირა მხარი საომარი მდგომარეობის გახანგრძლივებას.