პოლონეთის პრეზიდენტმა ანჯეი დუდამ განაცხადა, რომ უკრაინაში მშვიდობის მიღწევისთვის საუკეთესო შანსს დონალდ ტრამპი წარმოადგენს.

თუმცა, მან ხაზგასმით აღნიშნა, რომ ნებისმიერი მშვიდობა უნდა იყოს „სამართლიანი და ხანგრძლივი“.

როგორც დუდამ Sky News-თან ინტერვიუში განაცხადა, ტრამპს რუსეთის პრეზიდენტის სათანადოდ შეფასება შეუძლია.

„თუ ვინმეს შეუძლია, რომ რუსეთს ომის დასრულება აიძულოს, ეს ალბათ, აშშ-ის პრეზიდენტია. საკითხავი ის არის, თუ რამდენად მტკიცედ ექნება მას ეს გადაწყვეტილი, რადგან ევროპისთვისაც ძალიან მნიშვნელოვანია, რომ მშვიდობა სამართლიანი და ხანგრძლივი იყოს“, - აღნიშნა დუდამ.

პოლონეთის პრეზიდენტმა გაიხსენა, რომ მისი პირველი საპრეზიდენტო ვადის დროს ტრამპმა Nord Stream 2 შეაჩერა.

„ეს საკმარისი მტკიცებულებაა იმისა, რომ ტრამპმა იცის, სად უნდა დაარტყას, რომ ზიანი მიაყენოს“, - დასძენს დუდა.