ზუგდიდში, 9 აპრილის მემორიალთან შეკრებილ მოქალაქეებსა და პოლიციას შორის დაპირისპირება მოხდა.

ადგილზე მყოფ მოქალაქეებთან, რომლებიც აქციას მართავდნენ, პოლიცია მივიდა და შეკრებილებს განუმარტა, რომ სასულიერო პირებს 1989 წლის 9 აპრილს დაღუპულთა სულის მოსახსენიებელი პარაკლისი უნდა გადაეხადათ. მოქალაქეებმა პარაკლისზე დასწრების სურვილი გამოთქვეს, მაგრამ პოლიციამ მათ ამის საშუალება არ მისცა, რასაც ხმაური და დაპირისპირება მოჰყვა.

„ეს იყო თავდასხმა მშვიდობიან მომიტინგეებზე. გაგვარიდეს 9 აპრილის მემორიალს. ასე ექცევა საკუთარ მოქალაქეებს რუსეთი, რუსული რეჟიმი და რუსული სისტემა. ამათ ერთი რამე უნდა იცოდნენ კარგად, არავის საკუთარ ხალხთან ბრძოლა არ მოუგია და ვერც ესენი მოიგებენ. ჩვენი მიზანი იყო, რომ პატივი მიგვეგო 9 აპრილს დაღუპულთა ხსოვნისთვის, ამიტომ მშვიდობიანად ვიყავით შეკრებილი, მოქალაქეთა ნაწილმა საერთოდ გაათენა ღამე აქ. ამათი დამოკიდებულება ჩვენს მიმართ იმის ნიშანია, რომ ჩვენს ქვეყანას მართავს რუსული რეჟიმი. სამწუხაროდ, ქართული პოლიცია გადაიქცა რუსული საქმის გამკეთებლად," - განაცხადა ერთ-ერთმა მოქალაქემ.