საქართველო დგას თავის სიმაღლეზე, მისი დამოუკიდებლობის ხარისხი არის დღეს იმ დონეზე, რაც არ ყოფილა წინა ათწლეულების განმავლობაში და ეს არის ძალიან კარგი, რადგან მხოლოდ ამ შემთხვევაში შეგვიძლია ვთქვათ, რომ მხოლოდ საქართველოში წყდება ქართველების ბედი და არა რომელიმე სხვა ქვეყანაში, - განაცხადა საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ და პარტიის აღმასრულებელმა მდივანმა მამუკა მდინარაძემ ჟურნალისტის კითხვის პასუხად.
მისი თქმით, კიდევ უფრო გაზრდილი დამოუკიდებლობის ხარისხი ნიშნავს მეტ განვითარებას, სუვერენიტეტს, მეტი ეროვნული ინტერესის გატარებას.
„ჩვენ ეს შევძელით და თუკი დეოკუპაციაზე, დამოუკიდებელ მოქმედებებზე, ეკონომიკურ წინსვლაზე შეიძლება იყოს საუბარი, თუკი შენი ქვეყნის მართვაზე ქვეყნის შიგნიდან და არა აგენტებიდან შეიძლება იყოს საუბარი, ეს მხოლოდ იმ შემთხვევაში, თუ დამოუკიდებლობის ხარისხი კიდევ უფრო გაიზრდება. ჩვენ არ ვართ კმაყოფილი დღეს რაც გვაქვს, კიდევ უფრო გაზრდილი დამოუკიდებლობის ხარისხი ნიშნავს მეტ განვითარებას, სუვერენიტეტს, მეტი ეროვნული ინტერესის გატარებას“, - აღნიშნა მდინარაძემ.