საპარლამენტო ფრაქცია „ქართული ოცნების“ თავმჯდომარის მოადგილე ლევან მაჭავარიანი ევროკომისიის ვიცე-პრეზიდენტის კაია კალასის და გაფართოების საკითხებში ევროკომისარ მარტა კოსის მოწოდებებს საქართველოს ხელისუფლებას მიმართ ორმაგ სტანდარტად აფასებს და აღნიშნავს, რომ ევროკავშირის მაღალჩინოსნებს როცა სჭირდებათ „ქართულ ოცნებას“ ლეგიტიმურ ხელისუფლებას მოიხსენიებენ.
„როდესაც ეუთო-ოდირის საპარლამენტო ანგარიში გამოქვეყნდა არჩევნებთან დაკავშირებით, სადაც ხაზგასმით აღინიშნა, რომ საქართველოში ჩატარებული არჩევნები იყო კონკურენტული და ყველა სუბიექტს საშუალება ჰქონდა ეწარმოებინა თავისუფალ გარემოში საარჩევნო კამპანია, მაშინ მათ ეუთო-ოდირის გაშავება დაიწყეს, ამ შემთხვევაში პირიქით საუბრობენ, ეს რა თქმა უნდა ორმაგი სტანდარტია. როდესაც მათ რაღაც სჭირდებათ „ქართული ოცნებისგან“, მოგვიხსენიებენ როგორც ხელისუფლებას, როდესაც არ სჭირდებათ, მაშინ ჩვენს ლეგიტიმაციას არ აღიარებენ“, - აღნიშნა ლევან მაჭავარიანმა.
საქართველოში არსებული სიტუაციის შესახებ, ევროკავშირის უმაღლესმა წარმომადგენელმა/ ევროკომისიის ვიცე-პრეზიდენტმა კაია კალასიმ და გაფართოების საკითხებში ევროკავშირის კომისარმა მარტა კოსიმ განცხადება გაავრცელეს, სადაც ნათქვამია: „მოვუწოდებთ ხელისუფლებას, უზრუნველყოს დიალოგი ყველა პოლიტიკურ ძალასთან და ასევე - სამოქალაქო საზოგადოების წარმომადგენლებთან“. ავტორები საკანანმდებლო ცვლილებებთან დაკავშირებით მოუწოდებენ ხელისუფლებას, „შეაჩეროს ეს ზომები, თავი შეიკავოს დაძაბულობის შემდგომი გაზრდისგან და დაელოდოს ეუთოს დემოკრატიული ინსტიტუტებისა და ადამიანის უფლებათა ოფისის (OSCE / ODIHR) დასკვნას, სახალხო დამცველის მოთხოვნის შესაბამისად.“