სპეციალური პენიტენციური სამსახურის სამედიცინო დეპარტამენტის უფროსის, მალხაზ ურთქმელიძის განცხადებით, მზია ამაღლობელის ჯანმრთელობაზე ზედამხედველობა მიმდინარეობს პენიტენციურ სისტემაში დამტკიცებული მოშიმშილე ბრალდებულის/მსჯავრდებულის მართვის პროტოკოლის შესაბამისად, რაც გულისხმობს სასიცოცხლო მაჩვენებლების ყოველდღიურ მონიტორინგს, დინამიკაში ლაბორატორიული კვლევების ჩატარებას და საჭირო სპეციალისტების კონსულტაციას.

მისივე თქმით, მზია ამაღლობელს 28 იანვარს ჩაუტარდა ე.წ. გაფართოებული ლაბორატორიული კვლევა და ამ ეტაპზე მიღებული ნაწილი კვლევების მონაცემები ნორმის ფარგლებშია.

„ხვალ ჩატარდება კიდევ სხვა კვლევები, დაგეგმილია ინსტრუმენტული კვლევებიც. ამჟამად მზია ამაღლობელის ჯანმრთელობის მდგომარეობა დამაკმაყოფილებელი და სტაბილურია. დაწესებულებაში ყოფნის პერიოდში, ბრალდებული მრავალჯერ მოინახულა სახალხო დამცველის წარმომადგენელმა და მისმა ადვოკატმა. შემდგომშიც მათ შეუზღუდავად შეუძლიათ, განახორციელონ შეხვედრები და ბრალდებულის თანხმობის შემთხვევაში, გაეცნონ მისი ჯანმრთელობის შესახებ ყველა სახის ინფორმაციას. დასკვნის სახით უნდა ითქვას, რომ ბრალდებული მზია ამაღლობელის სიცოცხლე საფრთხეში არ არის და მომავალშიც გაგრძელდება მის სიცოცხლესა და ჯანმრთელობაზე ზრუნვა, ყველა საჭირო სამედიცინო მომსახურების გაწევით. ჩვენთვის თითოეული პატიმრის უსაფრთხოებასა და ჯანმრთელობაზე ზრუნვა პრიორიტეტულია“, – განაცხადა მალხაზ ურთქმელიძემ.