უკრაინის საგარეო საქმეთა სამინისტრო გმობს საქართველოს ხელმძღვანელობის განმეორებით მცდელობებს, ჩართოს უკრაინა თავისი ქვეყნის შიდა პოლიტიკურ პროცესებში 26 ოქტომბერს დაგეგმილი საპარლამენტო არჩევნების წინ - განცხადებას ამის შესახებ უკრაინის საგარეო უწყება ავრცელებს და პრემიერ კობახიძის გუშინდელ გამოსვლას ეხმაურება.
"საქართველოს პრემიერ-მინისტრის ირაკლი კობახიძის განცხადებების უპატივცემულო ტონის გათვალისწინებით, იძულებული ვართ, კიდევ ერთხელ გამოვხატოთ უკრაინის პოზიცია.
გასაკვირია საქართველოს ამჟამინდელი ხელისუფლების დაჟინებული ძალისხმევა, წაშალოს ქართველი ხალხის მეხსიერებიდან რუსეთის მრავალი დანაშაული, რომელიც მან ჩაიდინა და ახლაც სჩადის როგორც საქართველოს, ისე უკრაინის დროებით ოკუპირებულ ტერიტორიებზე.
სამარცხვინოდ მიგვაჩნია პარტია „ქართული ოცნების“ მიერ უკრაინის წინააღმდეგ რუსეთის დაუნდობელი ომის სურათების გამოყენება პოლიტიკურ რეკლამაში.
უკრაინულ თემაზე თავხედურმა სპეკულაციებმა გამოავლინა სიმართლე საქართველოს მმართველი პარტიის შესახებ, რომელიც მოიცავს უკრაინელი ხალხის სრულ ზიზღს და მზადყოფნას გამოუსწორებელი ზიანი მიაყენოს უკრაინელი და ქართველი ხალხების ტრადიციულ მეგობრულ ურთიერთობებს პოლიტიკური ქულების გამო.
საქართველოში დიდი მართლმადიდებლური დღესასწაულის, მცხეთობა-სვეტიცხოვლობის წინა დღეებში, მმართველი პარტიის "ქართული ოცნების" პოლიტიკურ რეკლამაში რუსი სამხედრო დამნაშავეების მიერ განადგურებული უკრაინული რელიგიური სიწმინდეების გამოსახულება განსაკუთრებულ აღშფოთებას იწვევს.
მწუხარებით ვაცხადებთ, რომ რუსეთის მიდგომებით, სამოქალაქო საზოგადოებისა და უფლებადამცველი ორგანიზაციების მონაწილეობის შეზღუდვით ქვეყნის დემოკრატიული განვითარების უზრუნველსაყოფად და კონკურენტული საარჩევნო გარემოს მხარდაჭერით, საქართველოს მთავრობა გადაიქცა კრემლის ქსეროქსად.
კიდევ ერთი სიმართლე უნდა შეგახსენოთ, რომლის გამჟღავნებაც დაავიწყდა საქართველოს პრემიერ-მინისტრს. საქართველოს ხელისუფლების უარი რუსეთის ფედერაციის წინააღმდეგ დაწესებული საერთაშორისო სანქციების მხარდაჭერაზე უკრაინის წინააღმდეგ სრულმასშტაბიანი აგრესიის საპასუხოდ, რუსეთთან პირდაპირი საჰაერო მიმოსვლის აღდგენა, 2000-იანი წლების დასაწყისში შემოღებული სავიზო რეჟიმის გაუქმება და გააქტიურება. ორმხრივმა ვაჭრობამ საქართველო დააბრუნა მოსკოვზე ეკონომიკური და პოლიტიკური დამოკიდებულების ფორმატში.
საქართველოს ქალაქებში რუსეთის ფედერაციის ტერიტორიაზე აკრედიტებული კერძო რუსული სკოლების გამოჩენა არა მხოლოდ აჩენს ეჭვს განათლების ხარისხთან დაკავშირებით, არამედ წარმოადგენს ქართველი ახალგაზრდების რასისტული პროპაგანდის ინდოქტრინაციის საფრთხეს." აცხადებს უკრაინის საგარეო და საქართველოს მთავრობას კიდევ ერთხელ მოუწოდებს, თავი შეიკავოს უკრაინისა და უკრაინელების ჩარევისგან საქართველოს შიდაპოლიტიკურ პროცესებში ჩარევისგან, ასევე უკრაინელი ხალხის სისხლისა და ტანჯვის საკუთარი ინტერესებისთვის გამოყენებაში.
უკრაინის საგარეო უწყება იმედოვნებს, რომ საპარლამენტო არჩევნები საქართველოში ჩატარდება მშვიდობიან და დემოკრატიულ პირობებში და ქართველი ხალხი გააგრძელებს ევროკავშირსა და ნატოში გაწევრიანების სტრატეგიულ კურსს.
შეგახსენებთ, კობახიძემ "იმედის" ეთერში თქვა, რომ საქართველოს მოსახლეობას არ ჰქონდა ინფორმაცია, თუ რა ხდება რეალურად უკრაინაში და მისი პარტიის წინასაარჩევნო "ბილბორდებმა და ვიდეორგოლმა გააშიშვლა სიმართლე".
მის ამ განცხადებას გამოეხმაურა პრეზიდენტ ზელენსკის ადმინისტრაციის ხელმძღვანელი ანდრეი ერმაკი.
ცნობისთვის, ეს უკვე მეორე განცხადებაა, რომელსაც უკრაინის საგარეო საქმეთა სამინისტრო ქართული ოცნების წინასაარჩევნო კამპანიასთან დაკავშირებით ავრცელებს.