წვევამდელთა ეროვნულ სამხედრო სამსახურში გაწვევის გადავადების შესახებ პრემიერ-მინისტრის ბრძანება ეხება მხოლოდ ინდივიდუალურ შემთხვევებს, რომლებსაც განიხილავს თავდაცვის კოდექსის საფუძველზე შექმნილი კომისია, – ამის შესახებ პარლამენტის თავდაცვისა და უშიშროების კომიტეტის თავმჯდომარემ, ალექსანდრე ტაბატაძემ განაცხადა.
„აღნიშნული მექანიზმი აქამდეც არსებობდა და ახლა ეს პროცესი, თავდაცვის კოდექსის საფუძველზე, უფრო დაიხვეწა, უფრო გამჭვირვალე და ინკლუზიური გახდა“, – განაცხადა ალექსანდრე ტაბატაძემ.
ალექსანდრე ტაბატაძემ მოუწოდა ყველას, თავი შეიკავონ დეზინფორმაციის გავრცელებისგან, რომელიც ეროვნული ინტერესებისათვის დამაზიანებელია.
საქართველოს პრემიერ-მინისტრმა, ირაკლი კობახიძემ წვევამდელთა ეროვნულ სამხედრო სამსახურში გაწვევის გადავადების შესახებ ბრძანება 14 აგვისტოს გამოსცა.