საპარლამენტო უმრავლესობის წევრის ირაკლი ზარქუას განცხადებით, ობიექტური შეფასების შემთხვევაში, საქართველოსთან მიმართებით აღიარებულია სწორი რეფორმები და მმართველობა, გამჭვირვალობა, სასამართლოს მიმართ ნდობა.
ირაკლი ზარქუამ კომენტარი გააკეთა აშშ-ის სახელმწიფო დეპარტამენტის საინვესტიციო კლიმატის შესახებ 2024 წლის ანგარიშზე, სადაც საქართველოსაც შეეხო საუბარი.
„სახელმწიფო დეპარტამენტის დასკვნაში ვკითხულობთ, თურმე საქართველო რეგიონში გამორჩეული ქვეყანაა თავისი რეფორმირებული ეკონომიკით, საინვესტიციო გარემოს მიმზიდველობით. ამას უმალავენ ბატონ კირბის ან მილერს, რომლებიც გვტუქსავენ ხოლმე იმის გამო, რომ დამოუკიდებელმა საქართველომ და ლეგიტიმურად არჩეულმა პარლამენტმა კანონი მიიღო? დემოკრატიაში უკან არისო და რანაირად მოხდა სახელმწიფო დეპარტამენტის ჩანაწერში, რომ ერთ-ერთი გამორჩეული ქვეყანა ვართ. ვინც რეგიონში ობიექტურად მიმოიხილავს ქვეყნებს, ნახავთ, რომ საქართველოს ბიუჯეტი მეორე წელია, ყველაზე გამჭვირვალეა, ნდობაა სასამართლოს მიმართ. დიახ, საქართველო ერთ-ერთი გამორჩეული და მიმზიდველია. სწორი რეფორმებისა და მმართველობის აღიარებაა", - განაცხადა ირაკლი ზარქუამ.