რამდენიმე საათია, სამაშველო ჯგუფები შეუჩერებლად მუშაობენ. ბაღდათის მუნიციპალიტეტში. სოფელ ნერგეეთში, მაშველები მეწყრის ჩამოწოლის შედეგად, საკუთარი სახლის ნანგრევებში მოყოლილებს ეძებენ. საუბარია, სავარაუდოდ, 6 ადამიანზე. ახლობლების თქმით, მათ შორისაა მამა და მისი სამი არასრულწლოვანი შვილი.

"წუხელ ერთი ამოიყვანეს, ჩემ აქ არ ყოფნაში, ცოცხალი. დანარჩენების ძებნა მიდის. არასრულწლოვნები არიან, ერთი მამა და სამი ბავშვი -15-16 წლამდე", - ამბობს ადგილობრივი. მოსახლეობა ჰყვება, რომ მსგავს სტიქიას ნერგეეთში არავინ ელოდა.

იმერეთის სახელმწიფო რწმუნებულის, ზვიად შალამბერიძის განცხადებით, ადგილზე სამძებრო-სამაშველო სამუშაოები ამ დრომდე გრძელდება.

"ძალიან დიდი მიწის მასა მოწყდა და მოიქცია ოთხი საცხოვრებელი სახლი. დასაწყისში ვეძებდით 10 ადამიანს. ამ წუთის მონაცემებით, ერთი ადამიანი ცოცხალია. სამწუხაროდ, სამი ცხედარი ვიპოვეთ, დანარჩენი 6 ადამიანის სამძებრო სამუშაოები მიმდინარეობს. მობილიზებულია ტექნიკა, რომელსაც ამ ლოკაციაზე შეუძლია იმუშაოს, ცოცხალი ძალაც, რა თქმა უნდა, ვაგრძელებთ სამუშაოებს", - განაცხადა ზვიად შალამბერიძემ.

მთავრობის ადმინისტრაციის რეგიონებთან ურთიერთობის დეპარტამენტის დირექტორის მოადგილის, მერაბ გამყრელიძის განცხადებით, სამუშაოები ყველა შესაძლო ტექნიკის გამოყენებით მიმდინარეობს.

"საგანგებო სიტუაციების მართის სამსახურის მიერ მიმდინარეობს სამაშველო - საძიებო სამუშაოები. დაახლოებით 200-მდე მეხანძრე-მაშველია ჩართული. სამუშაოები მიმდინარეობს ყველა შესაძლო ტექნიკის გამოყენებით, მათ შორის ძაღლების, დრონებითა და სხვა საშუალებებით. საბედნიეროდ მოხერხდა ერთ-ერთი ადამიანის გადარჩენა, სამი ცხედარია ნაპოვნი და მიმდინარეობს ექვსი ცხედრის ძიება. გამოძახებული არის შესაბამისი გეოლოგიური სამსახურები, რომლებიც ჩაატარებენ სრულყოფილ კვლევას რის შედეგადაც დაიდება შესაბამისი დასკვნა", - განაცხადა მერაბ გამყრელიძემ.