ბოლივიამ ღაზის სექტორში „აგრესიული და არაპროპორციული“ თავდასხმების გამო, ისრაელთან დიპლომატიური კავშირი გაწყვიტა. „ეს არის უარყოფა და დაგმობა ისრაელის აგრესიული და არაპროპორციული სამხედრო შეტევისა, რომელიც განხორციელდა ღაზის სექტორში“, – განაცხადა ბოლივიას საგარეო საქმეთა მინისტრის მოადგილემ, ფრედი მამანმა.
ამის პარალელურად, კოლუმბიამ და ჩილემ პროტესტის ნიშნად ისრაელიდან თავიანთი ელჩები გამოიწვიეს.
ჩილეს პრეზიდენტი გაბრიელ ბორიჩი „ტვიტერის“ საკუთარ გვერდზე წერს, რომ მისი ქვეყანა „მტკიცედ გმობს ისრაელის მიერ საერთაშორისო ჰუმანიტარული სამართლის დარღვევას.“
ამასთან, კოლუმბიის პრეზიდენტმა, გუსტავო პეტრომ განაცხადა, რომ თუ ისრაელი არ შეწყვეტს პალესტინელი ხალხის ხოცვა-ჟლეტას, კოლუმბიის წარმომადგენელი იქ ვერ დარჩება.