"თუკი კარასინის განცხადების საფუძველზე რუსეთი რაღაცას მიაღწევს, ეს იქნება ძალიან დიდი ზეიმის წინაპირობა/მიზეზი რადიკალური ოპოზიციის ფრთაზე", - ასე გამოეხმაურა "ქართული ოცნების" წევრი გია ვოლსკი რუსეთის ფედერაციის საბჭოს საერთაშორისო კომიტეტის ხელმძღვანელის, გრიგორი კარასინის განცხადებას, რომლის მიხედვითაც "რუსეთი ყველაფერს აკეთებს, რომ სხვა ქვეყნებმა, მათ შორის ჩინეთმა და ინდოეთმა, სამხრეთ ოსეთისა და აფხაზეთის სუვერენიტეტი აღიარონ".
"საკითხი იოლი არ არის, რადგან დასავლეთი [ქვეყნებს] საპირისპირო მიმართულებით უბიძგებს, თუმცა აბსოლუტურად დარწმუნებული ვარ, რომ ადრე თუ გვიან აღიარება იქნება. სამხრეთ ოსეთი დამოუკიდებლად ვითარდება, არავის ემუქრება და სურს, რომ საერთაშორისო საზოგადოების წევრი გახდეს. ეს ადვილი არ არის, მაგრამ მიღწევადია", - განაცხადა მან.