კონკურენციის სააგენტო კინოთეატრების ონლაინბილეთების რეალიზაციის საკითხს იკვლევს. მოკვლევა Biletebi.ge-ს მიმართვიანობისა და სარჩელის საფუძველზე დაიწყეს.

შუამდგომლობა დაკმაყოფილებულია სასამართლოს მხრიდან და ამ დროისთვის, კომპანიებს ბილეთების გაყიდვის ექსკლუზიური უფლება შეჩერებული აქვთ.

"თემა ეხება ბილეთები.ჯი-ს საჩივრის საფუძველზე დაწყებულ მოკვლევას, რომელიც მიმდინარეობს TKT.ge-სა და მისი მფლობელი კომპანია "თინეთის" წინააღმდეგ. "თინეთის" დამფუძნებელი არის "თბს ბანკ გრუპი", რომელიც რეგისტრირებულია ბრიტანეთში. საქმე ეხება დომინანტური მდგომარეობის შესაძლო არასათანადოდ გამოყენებას და მეორე ეს არის შესაძლო შეთანხმებული ქმედება რამდენიმე კომპანიას შორის. ხელშეკრულება, რომელიც გაფორმებულია კინოთეატრების რეალიზატორ კომპანიასა და "თინეთს" შორის, მოიცავდა ისეთ ჩანაწერებს, რომელიც წინასწარი შეფასებით, კონკურენციის ეროვნულმა სააგენტომ, კონკურენციის შემზღუდველ ჩანაწერად მიიჩნია. მივმართეთ სასამართლოს, რომელმაც ჩვენი შუამდგომლობა დააკმაყოფილა და აღნიშნულ ხელშეკრულებაში, ექსკლუზივის ჩანაწერის პირობა ამ ეტაპზე შეჩერებულია. ეს გულისხმობს იმას, რომ თუკი აქამდე მხოლოდ TKT.ge-ს ჰქონდა კინოთეატრების ბილეთების ექსკლუზიურად რეალიზაციის უფლება, ამ გადაწყვეტილების შემდეგ ნებისმიერს შეუძლია ამ მიმართულებით იმუშაოს. ეს შეჩერება მოკვლევის დასრულებამდე გაგრძელდება," - აცხადებს კონკურენციის ეროვნული სააგენტოს თავმჯდომარე ირაკლი ლექვინაძე.