სოფელ ლამბალოში მოკლულ ძმებს გლოვობენ - „ტვ პირველმა“ კახეთში მომხდარი შეიარაღებული თავდასხმის ახალი დეტალები გაარკვია. როგორც ლამბალოში „ტვ პირველს“ უყვებიან, გუშინ, სამი ძმა მეზობელთან ერთად ქორწილში მიდიოდა, რა დროსაც მათ წინ მანქანა გაჩერდა და შიგნით მჯდომმა პირმა ცეცხლი გაუხსნათ.

შეიარაღებული თავდასხმის შედეგად, ორი ძმა - 65 და 67 წლის კაცები ადგილზე გარდაიცვალნენ, ხოლო მესამე ძმამ - ელმან უსუფოვმა და მეზობელმა გაქცევა მოახერხეს. როგორც უსუფოვი, რომელსაც ძმები თვალწინ მოუკლეს, „ტვ პირველს“ უყვება, თავდამსხმელი სანადირო თოფით უმისამართოდ ისროდა, შემდეგ კი მიმალვა სცადა. პოლიციამ ეჭვმიტანილი დანაშაულის ადგილიდან რამდენიმე კილომეტრში დააკავა.

ძმების მკვლელობასთან დაკავშირებით, გადარჩენილი მესამე ძმა დეტალებს ჰყვება. „ტვ პირველის“ ინფორმაციით, დაკავებული 54 წლის ბალშინ კაიბოვია. მან სრულად ითანამშრომლა პოლიციასთან და ჩადენილი დანაშაული აღიარა. 

რაც შეეხება სისხლიანი ანგარიშსწორების მოტივს- ერთი-ერთი ვერსიით, ის წარსულში მომხდარ ამბავს უკავშრდება., რომლის თანახმადა დაკავებულის  ძმამ უსუფოვების დისშვილი მოიტაცა, მათ კი გოგო უკან დააბრუნეს, რის შემდეგაც ის ქვეყნიდან წავიდა და გარდაიცვალა.

სოფელში ამის შესახებ კამერების წინ არ საუბრობენ, მხოლოდ იმას ამბობენ, რომ ბალშინ კაიბოვს მესამე ძმის მოკვლაც სურდა. 

„ჩემი მამიდაშვილის ბიჭია, არ ვიცი, რატომ მოკლა, მტრები არ იყვნენ. არ ვიცი, რა მოდა. სროლა რომ დაიწყო, ერთი ძმა გაიქცა, თორემ ამ ძმის მოკვლაც უნდოდა, ქორწილი იყო ზევით და იქ მიდიოდნენ“, - ამბობს ადგილობრივი.  

ლამბალოში გვიან ღამემდე საგამოძიებო მოქმედებები მიმდინარეობდა - პოლიციამ გამოკითხა მეზობლები და მოკლული ძმების ნათესავებიც.  შსს-მ ერთი პირს ხელბორკილები მომხდარიდან მალევე დამამძიმებელ გარემოებაში ჩადენილი ორი პირის განზრახ მკვლელობისთვის დაადო.  გამოძიება სისხლის სამართლის კოდექსის 109-ე მუხლით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.