რვა ქვეყნის საგარეო საქმეთა მინისტრები აშშ-ის მიერ სისხლის სამართლის საერთაშორისო სასამართლოსთვის სანქციების დაწესების შესახებ ერთობლივ განცხადებას ავრცელებენ.
კანადის, დანიის, გერმანიის, საფრანგეთის, იტალიის, იაპონიის, ნიდერლანდებისა და გაერთიანებული სამეფოს საგარეო საქმეთა მინისტრები სისხლის სამართლის საერთაშორისო სასამართლოს (ICC) მიმართ მხარდაჭერას ადასტურებენ.
ერთობლივ განცხადებაში მინისტრები ხაზგასმით აღნიშნავენ, რომ მხარს უჭერენ სასამართლოს დამოუკიდებლობას, მიუკერძოებლობასა და კეთილსინდისიერებას.
„როგორც სისხლის სამართლის საერთაშორისო სასამართლოს ერთგული მხარდამჭერები, ვწუხვართ და კატეგორიულად არ ვეთანხმებით აშშ-ის განცხადებას სასამართლოს წინააღმდეგ სანქციების დაწესების შესახებ“, – ნათქვამია განცხადებაში.
მინისტრები დადებითად აფასებენ სასამართლოს მიერ გადადგმულ ნაბიჯებს, რომლებიც შესაძლო საპასუხო სანქციებისთვის მომზადებასა და რომის სტატუტით განსაზღვრული მანდატის შესრულების გაგრძელებას ისახავს მიზნად. ისინი ასევე ადასტურებენ მტკიცე მხარდაჭერას სასამართლოს შესაძლებლობის მიმართ, შეუფერხებლად განაგრძოს საქმიანობა.
განცხადებაში აღნიშნულია, რომ სანქციების ამოქმედება მნიშვნელოვან გავლენას მოახდენს სასამართლოს საქმიანობაზე, მის თანამშრომლებსა და მათი ოჯახის წევრებზე.
„სასამართლოს თანამშრომლები ყოველდღიურად მუშაობენ, რათა უმძიმეს საერთაშორისო დანაშაულებში ბრალდებულები მართლმსაჯულების წინაშე წარდგნენ და დაზარალებულებმა მხარდაჭერა მიიღონ“, – აცხადებენ მინისტრები.
რვა ქვეყნის საგარეო საქმეთა მინისტრები კიდევ ერთხელ ადასტურებენ სასამართლოს მხარდაჭერის საკითხზე ერთიანობას და აცხადებენ, რომ მზად არიან, კონსტრუქციული და ინკლუზიური დიალოგი გამართონ იმ ქვეყნებთან, რომლებიც სასამართლოს წევრები არ არიან.
მინისტრების განცხადებით, ისინი გააგრძელებენ ერთობლივ მუშაობას სასამართლოს მნიშვნელოვანი საქმიანობის მხარდასაჭერად, წესებზე დაფუძნებული საერთაშორისო სისტემის დასაცავად და პასუხისმგებლობის დაკისრების მექანიზმების გასაძლიერებლად.
ცნობისთვის, სისხლის სამართლის საერთაშორისო სასამართლოს ყოფილი მოსამართლისთვის, ნავი პილაისთვის ნობელის პრემიის გადაცემის შემდეგ დონალდ ტრამპის ადმინისტრაციამ ჰააგის სასამართლოს სანქციები დაუწესა.
როგორც სისხლის სამართლის საერთაშორისო სასამართლოში განაცხადეს, აშშ-ის სანქციები საერთაშორისო სამართალზე თავდასხმაა.