პარლამენტის თავმჯდომარის პირველი მოადგილე, გიორგი ვოლსკი ევროპარლამენტი საქართველოს შესახებ გამართულ დებატებს ეხმაურება.
ვოლსკის შეფასებით, ევრობიუროკრატებმა პოლიტიკურ პატიმრებად შერაცხეს ადამიანები, ვინც ექსტრემისტული პროცესები წაახალისეს. მისი განცხადებით, ექსტრემიზმის წახალისება და ძალადობრივი ჯგუფების პოლიტიკურ პატიმრებად წარმოჩენა მიუღებელია.
"პოლიტიკურ პატიმრებად შერაცხეს ადამიანები, ვინც გამოიყვანეს ამ ექსტრემისტული პროცესების წახალისების დაფინანსებულ ფორმატში, რომელიც თავადვე შექმნეს. რასაკვირველია, ყველა ვადევნებდით თვალყურს რა პროცესები მიდიოდა ქვეყანაში, დედაქალაქში, დედაქალაქის ცენტრში და აქედან გამომდინარე, ვერავის ვერ დავარქმევთ პოლიტპატიმარს, ვისაც მახვილი ეჭირა ხელში და ცდილობდა, განზრახვა ჰქონდა, რომ ეს მახვილი საქართველოსთვის ჩაეცა გულში.
ეს არ არის მხოლოდ პოლიტიკური შეტევა საქართველოზე, ეს არის ფსიქოლოგიური შეტევა საქართველოზე, იმ რეალობაზე, რომელიც დღეს ჩვენ ქვეყანაში გაგვაჩნია", - განაცხადა გიორგი ვოლსკიმ.
ევროპარლამენტი საქართველოს შესახებ მორიგ რეზოლუციას დღეს უყრის კენჭს. პროექტის ავტორები არიან ევროპის სახალხო პარტია, რომლის წევრიც არის "ნაციონალური მოძრაობა", ასევე ევროპული თავისუფალი ალიანსის წარმომადგენლები.
კენჭისყრამდე უკვე გაიმართა დებატები - ცარიელი დარბაზი, მუქარა სანქციებით, ისევ მოთხოვნა სააკაშვილის და იმ პატიმრების გათავისუფლების შესახებ, რომელთა დიდმა ნაწილმაც დანაშაული უკვე აღიარა და მოინანია.