უკრაინა გერმანიისგან კიდევ უფრო მეტ შეიარაღებასა და მნიშვნელოვან სადაზვერვო მონაცემებს მიიღებს, რათა ფრონტის ხაზსა და მის მიღმა რუსი ოკუპანტები ეფექტურად გაანადგუროს, - იუწყება გერმანული გამოცემა Der Spiegel-ი.

ჟურნალისტებისთვის ცნობილი გახდა, რომ რუსეთთან ომში უკრაინის პოზიციების მნიშვნელოვანი გაძლიერება გერმანიის გეგმის ერთ-ერთი მთავარი კომპონენტია. ამ გზით ბერლინი მოსკოვზე შურისძიებას გეგმავს ლაიფციგ-ჰალეს აეროპორტზე თავდასხმის მცდელობის გამო.

სექტემბერში გერმანიის ხელისუფლება უკრაინისთვის შემდეგი დახმარების გაწევას გეგმავს: ათასობით მოიერიშე დრონი და რაკეტები Iris-T საჰაერო თავდაცვის სისტემებისთვის.

გარდა ამისა, ბერლინი სავსებით მზადაა, გააღრმავოს თანამშრომლობა გერმანიისა და უკრაინის სპეცსამსახურებს შორის.

გერმანიის მთავრობაში არსებულმა წყაროებმა მედიას განუცხადეს, რომ კანცლერ ფრიდრიხ მერცის გუნდი უკრაინას ასევე დაეხმარება სამიზნეების კოორდინატების დადგენაში, რათა რუსეთის ტერიტორიაზე საპასუხო დარტყმები განხორციელდეს.

ანონიმური წყაროების ცნობით, ბუნდესტაგი მალე მხარს დაუჭერს კანონს დაზვერვის სამსახურების შესახებ, რაც მტრულ თავდასხმებთან დაპირისპირებისას მათი მოქმედების არეალს გააფართოებს.

მომავალში, გერმანიის ფედერალური დაზვერვის სამსახურის (BND) თანამშრომლებმა შესაძლოა მიიღონ ფართო უფლებამოსილება მტრული კიბეროპერაციების აღსაკვეთად. მათ შეეძლებათ მოწინააღმდეგის კომპიუტერებსა და სერვერებზე წვდომა და მოპარული ინფორმაციის წაშლა.

სპეცსამსახურებს ასევე შეეძლებათ ჩარევა მიწოდების ჯაჭვებში - მაგალითად, მტრული სახელმწიფოებისთვის განკუთვნილ ტვირთებში ცალკეული კომპონენტების ჩანაცვლებით.