„უცხოური გავლენის გამჭვირვალობის შესახებ" კანონპროექტის განხილვა პარლამენტში ორშაბათიდან იწყება. ოპოზიცია მმართველ პარტიას მწვავედ აკრიტიკებს და კანონის წინააღმდეგია, თუმცა, შარშანდელი ანალოგიური სიტუაციისაგან განსხვავებით, კანონპროექტის პარლამენტში დაბრუნებას არც სპონტანური რეაქცია მოჰყოლია თუნდაც ე.წ. სირცხვილის კორიდორების მოწყობით და არც განხილვების პარალელური აქციები ჩაუნიშნავთ.

როგორც ანალიტიკოსი ვახტანგ ძაბირაძე „რეზონანსთან" აცხადებს, შარშანდელმა მოვლენებმა აჩვენა, რომ ამ თემაზე ოპოზიციის აქტიურ ჩართვას „ოცნება" სათავისოდ გამოიყენებს. მისივე თქმით, აქ წამყვანი უფრო არასამთავრობო და საზოგადოებრივი სექტორი უნდა იყოს.

პარლამენტის ბიუროს 8 აპრილის სხდომაზე ინიცირებისათვის „უცხოური გავლენის გამჭვირვალობის შესახებ" კანონის პროექტი წარედგინება. ბიურო მას განსახილველად პარლამენტის კომიტეტებს გადასცემს. კანონპროექტი ფრაქცია „ქართული ოცნების" სახელით არის რეგისტრირებული. ის შინაარსით გასულ წელს ინიცირებული და საპროტესტო აქციების შედეგად ჩაგდებული პროექტის ანალოგიურია.

ორშაბათსვე, პარლამენტის ბიუროს „უცხოური გავლენის გამჭვირვალობის შესახებ" კანონპროექტის ალტერნატიულ პროექტად „ოკუპანტი ქვეყნის - რუსეთის ფედერაციის გავლენებისგან დაცვის შესახებ" კანონის პროექტი წარედგინება. ესეც 8 აპრილის სხდომაზე ინიცირდება და განსახილველად კომიტეტს გადაეცემა. ალტერნატიული კანონპროექტი პარლამენტმა ძირითად კანონპროექტთან ერთად უნდა განიხილოს. პროექტის ინიციატორები არიან პარტიის „გახარია - საქართველოსთვის" დეპუტატები ბექა ლილუაშვილი, ანა ბუჩუკური, მიხეილ დაუშვილი, შალვა კერესელიძე და დამოუკიდებელი დეპუტატი თეონა აქუბარდია.

ვინ რისთვის ემზადება

დამოუკიდებელი ოპოზიციონერი დეპუტატი თეონა აქუბარდია აცხადებს, რომ მაშინ, როცა ოპოზიცია ერთიანი არაა, ასეთ თემაზე სტრატეგია სამ დღეში არ იწერება.

„ქართულ ოცნებას" რომ მარტო განცხადებით ვერ დაუპირისპირდები, ხომ გასაგებია, მაგრამ პოზიციის დაფიქსირება აუცილებელია. ქართულ მედიას ძალიან უცნაური დამოკიდებულება აქვს. მაშინვე, როდესაც რაღაც პრობლემა ჩნდება, გეკითხებიან, რაიმე სტრატეგია ხომ არ გაქვს. მაშინ, როდესაც ომის მოგება გინდა, სტრატეგია 1 და 3 დღეში არ იწერება. ეს მითუმეტეს მაშინ, როდესაც ოპოზიცია ერთიანი არ არის.

„შარშან აქციები სტრატეგიის ნაწილი არ იყო, ეს სპონტანური მუხტი იყო და „ოცნების" მიერ კანონის გაწვევაც სპონტანური იყო. მე არ მყავს ჯარი, რომელსაც საჭიროების შემთხვევაში მოვუხმობ, რომ გამოვიდნენ. ერთი დეპუტატი ვარ, რომელსაც იმაზე მეტი რესურსი არ მაქვს, რასაც ვაკეთებ, მაგრამ ვიცი რას ვაკეთებ ჩემს კოლეგებთან ერთად პარლამენტში. ახლა, ორშაბათს, ბიუროზე რომ რუსული კანონი დარეგისტრირდება, იქვე იქნება ჩვენი ალტერნატიული ვარიანტი, რომელიც რუსულ მავნე გავლენებზეა აქცენტირებული", - განაცხადა თეონა აქუბარდიამ „პალიტრანიუსთან".

„მოქალაქეების" დეპუტატი ალეკო ელისაშვილი აცხადებს, რომ „დიდი ცემა-ტყეპისთვის" უნდა მოვემზადოთ.

„აბჯარი ავისხათ და მოვემზადოთ დიდი ცემა-ტყეპისთვის. დიდი ბრძოლა და ვნებათაღელვა გველის - იმაზე უარესი, რაც იყო, რადგან ახლა უფრო გაშმაგებით არიან მობილიზებულები. არც ეს კანონი უნდა მივაღებინოთ. თუ აქცია იქნება საჭირო, უნდა გამოვიდეთ. ქუჩაში თუ იქნება გასასვლელი, უნდა გავიდეთ. თუ საჩხუბარი იქნება, უნდა ვიჩხუბოთ. პარლამენტში საჩხუბარი იქნება - უნდა ვიჩხუბოთ, რადგან ამათ არაფერი ესმით", - განაცხადა ელისაშვილმა „პალიტრანიუსთან".

რატომ არ აქტიურობს ოპოზიცია

ანალიტიკოსი ვახტანგ ძაბირაძე „რეზონანსთან" აცხადებს, რომ არც შარშან მარტის აქციებზე იყო ოპოზიცია ამ თემაზე აქტიური და ძირითადად თემა ახალგაზრდებმა და არასამთავრობო სექტორმა წამოსწია.

„არც ადრე იყო პოლოტიკური ოპოზიცია მაინცდამაინც ამ თემაში ჩართული. ძირითად თემა წამოსწია ახალგაზრდობამ და არასამთავრობო სექტორმა, პარტიების მონაწილეობა მინიმალური იყო. ახლა, როგორც ამბობენ, განხილვის პროცესი გაგრძელდება. ალბათ ჯერ კომიტეტებიდან დაიწყებენ. რამდენადაც ვიცი, არასამთავრობო ორგანიზაციებმა დააანონსეს, რომ 8 აპრილს შეიკრიბებიან და რამდენად ძლიერი იქნება, ვერ გეტყვით. თუმცა, თუ შეიკრიბნენ, ხალხი მაინც იქნება", - განაცხადა ძაბირაძემ.

კითხვაზე, თავად ოპოზიცია რატომ არ აქტიურობს, ანალიტიკოსმა გვითხრა:

„თუ გახსოვთ, შარშან ეს თემა პოლიტიკური რომ არ ყოფილიყო, ძირითადად ახალგაზრდობამ და არასამთავრობო სექტორმა აიღეს ყველაფერი თავის თავზე. ძირითადად ახალგაზრდები იყვნენ. იმ გამოსვლებმა მაშინ შედეგად მოიტანა ის, რომ ხელისუფლებას არ ჰქონდა არანაირი არგუმენტი, რომ პოლიტიკოსებისთვის დაებრალებინა ეს პროტესტი. გახსოვთ ალბათ, ვაშაძეს მიკროფონი რომ არ მისცეს. „ოცნებას" არ მიეცა არგუმენტი ელაპარაკა იმაზე, რომ ესენი არიან რადიკალები, რომ ოპოზიციაა და ა.შ. ამან უფრო შედეგი გამოიღო, ვიდრე პარტიების ჩართულობამ.

„არ ვფიქრობ, რომ ამ პროტესტში პარტიები უნდა იყვნენ წამყვანები. უფრო არასამთავრობო და საზოგადოებრივმა სექტორმა უნდა იაქტიუროს, ზუსტად ისე, როგორც შარშან. რეალურად რომ ვთქვათ, ძირითადად ეს შეზღუდვა არასამთავრობოებს ეხება, მათი განადგურებისკენ თუ არა, სახელის გატეხვისკენაა მიმართული და პროტესტი ამ შემთხვევაში მათი სფერო უფროა, ვიდრე პარტიების. პარტიებმა შეიძლება მხარი დაუჭირონ, მაგრამ წამყვანი ისევ და ისევ ახალგაზრდობა და არასამთავრობო სექტორი უნდა იყოს.

„ოცნება" საკმაოდ ჭკვიანურად აწარმოებს თავის საარჩევნო კამპანიებს იმ შესაძლებლობებიდან გამომდინარე, რა მხარდაჭერაც მას მოსახლეობაში აქვს. ნახეთ ახლა როგორ თქვეს - ჩვენ ახლა არ ვიჩქარებთ და კანონპროექტს თანდათან განვიხილავთო. იქ განსახილველი არაფერია, არსი და აზრი ისაა, რომ კომიტეტზე ამის განხილვა რამდენჯერაც იქნება, იმდენჯერვე იქნება პროტესტი ქუჩაშიც და კომისიის სხდომაზეც, შესაბამისად, იმდენჯერვე იქნებიან მედიასაშუალებები ამით დაკავებული. ხელისუფლება ცდილობს ოპოზიცია აბალახოს იმ მინდორზე, რომელსაც თვითონ შეუკვეთავს, ეს იმიტომ, რომ ოპოზიციამ არ ილაპარაკოს სოციალურ პრობლემებზე, კორუფციაზე, სამუშაო ადგილებზე, დემოგრაფიაზე, ანუ ძირითად პრობლემებს მოწყვიტოს.

„ლგბტ კანონზე რა ქნეს?! იციან, რომ კონსტიტუციაში ცვლილებები არ გავა, მაგრამ განხილვები იქნება, რისი ფარდის ქვეშაც საარჩევნო კამპანიას ჩაატარებენ. მიიღებენ ამას თუ არა, მნიშვნელობა არ აქვს. სახელმწიფო აქტიურად დააფინანსებს მინიმუმ 60 მუნიციპალიტეტში ამის განხილვას, ეს პროცესი საკონსტიტუციო ცვლილების ჭრილში წავა და არა როგორც საარჩევნო კამპანიის. არადა ეს საარჩევნო პროცესი იქნება.

„ოპოზიცია კი თავის საარჩევნო კამპანიას არ უნდა მოწყდეს. კომისიის სხდომებზე უბრალოდ ხანდახან აზრი უნდა დააფიქსირონ ხოლმე, მაგრამ თავის საარჩევნო განრიგს არ უნდა მოწყდეს და იმ თემებზე ილაპარაკოს, რაც აუცილებელია. ოპოზიციამ ხელისუფლების მინდორზე თამაში არ უნდა დაუშვას", - განაცხადა ვახტანგ ძაბირაძემ „რეზონანსთან".