26 მაისის ღონისძიებების ფარგლებში, ორბელიანის მოედანზე მრავალფეროვანი კულტურული, გასართობი და შემეცნებითი აქტივობები გაიმართება. ხვალ დილიდან ათონელის და ფურცელაძის ქუჩები, ასევე ალექსანდრეს ბაღი და მიმდებარე ტერიტორია სხვადასხვა სახის პროგრამით უმასპინძლებს სტუმრებს.

„ალექსანდრეს ბაღი და ათონელის ქუჩა დაეთმობა საბავშვო სივრცეებს, სადაც მთელი დღის განმავლობაში ნაჩვენები იქნება ქართული ანიმაციური ფილმები. ათონელის ქუჩაზე მოეწყობა სცენა, სადაც 12:00-ზე დაიწყება საბავშვო მუსიკალური სტუდიების კონცერტი. ხოვისა და ხაზინის ქუჩა დაეთმობა სპორტულ სივრცეს, ხოლო ფურცელაძის ქუჩა სამ განსხვავებული სივრცეს უმასპინძლებს: პირველი არის ღვინის სივრცე, სადაც მოეწყობა ღვინის ბარი და მეღვინე მეწარმეების პროდუქციის გამოფენა-გაყიდვა. საგამოფენო სივრცეში გამოფენილი იქნება ქართული ნაქარგები და სახელოვნებო სივრცეში მოეწყობა სცენა, გაიმართება საუბრები ხელოვნებაზე, შესრულდება სხვადასხვა მუსიკალური ნაწარმოები. ვეკუას ქუჩაზე თბილისის მერიის ორგანიზებით, მოეწყობა კვების სივრცე, რომელსაც მთელი დღის განმავლობაში გააფორმებს DJ. ღონისძიების კულმინაციად პრეზიდენტის სასახლის ეზოში 17:10 შესრულდება ჰიმნი“, - განაცხადა 26 მაისის ღონისძიებების კულტურის სამინისტროს ჯგუფის წარმომადგენელმა სალომე ხურცილავამ.