სალომე ზურაბიშვილი ზოგადად ვერ მეგობრობს კანონთან და პროცედურებთან. მისი პოლიტიკური სიშლეგე არ აძლევს საშუალებას, რომ რაიმე კონსტიტუციური ან კანონის ჩარჩოში გააკეთოს, - განაცხადა საქართველოს პარლამენტის თავმჯდომარის მოადგილემ ნინო წილოსანმა.

„ის არ მივა პროკურატურაში გამოკითხვაზე არა, ის ვერ მივა გამოკითხვაზე, იმიტომ, რომ მას რეალურად არანაირი არგუმენტი და ფაქტები არ აქვს იმ ბრალდებების უკან, რასაც ის აცხადებდა“, - აღნიშნა ნინო წილოსანმა.

წინასაარჩევნო პერიოდში და არჩევნების დღეს ჩადენილი სავარაუდო დანაშაულების ფაქტებზე, სისხლის სამართლის 47 საქმეზე გამოძიება მიმდინარეობს, – განცხადებას პროკურატურა ავრცელებს. საგამოძიებო უწყება განმარტავს, რომ გამოძიებების დაწყებას საფუძვლად დაედო ოპოზიციური და მმართველი პარტიების, ცენტრალური საარჩევნო კომისიის და არასამთავრობო ორგანიზაციების მიმართვები, ასევე მედიით გავრცელებული ინფორმაციები.

საქართველოს პროკურატურამ არჩევნების სავარაუდო გაყალბების საქმეზე გამოძიება დაიწყო და სალომე ზურაბიშვილი გამოკითხვაზე დაიბარა. თუმცა, გამოძიებასთან თანამშრომლობაზე ზურაბიშვილი და რადიკალური ოპოზიციის ლიდერები უარს აცხადებენ.