ჩეხებთან ველოდებით, დაახლოებით ისეთივე ხასიათის თამაშს, როგორიც რამდენიმე თვის წინ გვქონდა, თუმცა ამჯერად წარმატების მისაღწევად გაცილებით უფრო მეტი ძალისხმევა დაგვჭირდება, - განაცხადა პრესკონფერენციაზე საქართველოს ნაკრების მწვრთნელმა ვილი სანიოლმა.

„იგივე სულისკვეთების შენარჩუნებაა საჭირო, როგორიც ევროპის ჩემპიონატზე გვქონდა. სხვადასხვა მიზეზის გამო რამდენიმე მცველი გამოგვაკლდა. საბა გოგლიჩიძეს კი დიდი ხანია ვაკვირდები და მისი იმედი მაქვს", - აღნიშნა მწვრთნელმა.

სექტემბრის სანაკრებო პაუზის ფარგლებში საქართველოს ეროვნული გუნდი ერთა ლიგის ორ მატჩს გამართავს. 7 სექტემბერს, მიხეილ მესხის სახელობის სტადიონზე ნაკრები ჩეხეთს უმასპინძლებს. 10 სექტემბერს კი, ტირანაში, ჩვენი გუნდის მეტოქე ალბანეთის ეროვნული ნაკრები იქნება.