პენსილვანიის შტატში მხარდამჭერებთან შეხვედრის დროს, დონალდ ტრამპს, სავარაუდოდ, სნაიპერმა ესროლა. ექსპრეზიდენტს დაზიანება ყურის არეში აღენიშნება. მამაკაცი, რომელიც ექსპრეზიდენტს და რესპუბლიკელების მოქმედ საპრეზიდენტო კანდიდატს თავს დაესხა, სპეცსამსახურის თანამშრომლებმა მოკლეს.

მათივე ინფორმაციით, თავდამსხმელმა შეკრებაზე ერთი ადამიანი მოკლა, კიდევ ორი კი მძიმედ არის დაჭრილი.

თვითმხილველები აცხადებენ, რომ გასროლამდე მათ დაინახეს პირი, რომელიც ცეცხლსასროლი შაშხანით სახურავზე იჯდა. ვიდეო კადრებში ჩანს, თუ როგორ ვარდება ძირს ტრამპი, შემდეგ კი დასისხლიანებული სახით დგება.

FBI-მ დონალდ ტრამპზე თავდამსხმელის ვინაობა გაასაჯაროვა. მათი ინფორმაციით, ექსპრეზიდენტს და პრეზიდენტობის კანდიდატს თავს 20 წლის თომას მეთიუ კრუკსი დაესხა.

FBI-ის მიერ გავრცელებულ ინფორმაციაში ნათქვამია, რომ ფაქტზე გამოძიება გრძელდება. ფედერალური ბიურო მოუწოდებს საზოგადოებას, დამატებითი ინფორმაციის ფლობის შემთხვევაში, მათ სპეციალურ ნომერზე დაუკავშირდნენ.

შეგახსენებთ, რომ პენსილვანიის შტატში მხარდამჭერებთან შეხვედრის დროს, დონალდ ტრამპს ესროლეს. მამაკაცი, რომელიც ექსპრეზიდენტს და რესპუბლიკელების მოქმედ საპრეზიდენტო კანდიდატს თავს დაესხა, სპეცსამსახურის თანამშრომლებმა მოკლეს.

თავდამსხმელმა შეკრებაზე ერთი ადამიანი მოკლა, კიდევ ორი კი მძიმედ არის დაჭრილი. თავად ტრამპს დაზიანება მხოლოდ ყურის არეში აღენიშნება, მის სიცოცხლეს კი საფრთხე არ ემუქრება.