13 ივნისს, ღამის 12 საათზე ახალციხეში, თამარაშვილის 29-ში მდებარე მრავალბინიან საცხოვრებელ კორპუსში ხანძარი გაჩნდა. ცეცხლი მთლიანად მოედო სახურავს. ხანძრის გამომწვევი ზუსტი მიზეზი უცნობია. შენობიდან მაცხოვრებლების ევაკუაცია მიმდინარეობს. ადგილზე მობილიზებულია სახანძრო-სამაშველო ეკიპაჟები.

თვითმხილველების თქმით, ხანძარი კორპუსის სახურავზე დაახლოებით 00:00 საათზე გაჩნდა. ადგილობრივების თქმით, კორპუსიდან უკვე ყველა მაცხოვრებელი ევაკუირებულია.

„სახლში ვიყავი, კარებზე დამიკაკუნეს ხანძარიაო და გავიქეცით. რა მოხდა არ ვიცით...“, - განუცხადა კორპუსის ერთ-ერთმა მაცხოვრებელმა „სამხრეთის კარიბჭეს“.

ამ დროისთვის, დაშავებულების შესახებ ინფორმაცია არ ვრცელდება. შემთხვევის ადგილზე იმყოფება სასწრაფო სამედიცინო დახმარების ჯგუფი.

„სამხრეთის კარიბჭე“